1991թ. քաղաքացուն երեք սենյականոց բնակարան էին խոստացել, մինչ օրս նա դա չի տեսել

Lragrogh.com-ի խմբագրություն է դիմել ՀՀ քաղաքացի Ելենա Սուքիասյանը դեռեւս 1991թ. պետության կողմից ստացել է որոշում, որ իրեն է տրամադրվում Երեւանի Ֆրունզե 98 հասցեում  երեք սենյականոց  բնակարան։ Դրանից մեկ տարի առաջ այնտեղ հրդեհ է եղել, ինչի պատճառով  քաղաքացին հայտնվել էր դրսում։ Որոշումը ձեռքին՝ տիկին Ելենան  առ այսօր ապրել ու ապրում է վարձով, բարեկամների տներում։

«Մինչ օրս դիմել եւ դիմում եմ թե՛ կառավարություն, թե՛ Երեւանի քաղաքապետարան, թե՛ թաղապետարան, թե՛ Մարդու իրավունքների պաշտպանի գրասենյակ։ Քաղաքապետարանում ասել են, որ շենքը կառուցվելու է, առաջին հերթում ես»,- նշում է քաղաքացին։

Տիկին Ելենան ասում է, որ ժամանակին հավաստիացրել են, որ մի քանի ամիս թող յոլա գնան, շենքը կկառուցվի, իրենք  կտեղափոխվեն այնտեղ ապրելու։

«Տղաս այն  ժամանակ նոր էր  եկել բանակից, ինչ ունեինք՝ վաճառեցինք, վարձով էինք ապրում, հիմա դրա հնարավորությունը չկա։ Սկզբում ասում էին, որ Բ-1 թաղամասում պետք է լինի, հետո ասացին, որ Բ-1-ը չի կառուցվում, գնա խնայբանկում գումար մուծի։ Չեմ հիշում, թե ինչքան մուծեցի, որ ուրիշ տեղ կառուցեն շենքը։ Բայց  այդ շենքն անհետացել է։  Բ-3 թաղամասում պետք է կառուցվեր, գնում եմ, այնտեղ 9-րդ շենքը կա, 11-րդ շենքը կա, 10-րդը չկա, ասում են՝ խաղահրապարակ են կառուցել։ Մի անգամ գնացի Նազարբեկյան փողոց, կիսակառույց շենք կա, մարդիկ ապրում են, միգուցե իմ տունն էլ այնտեղ է»,-ասում է տիկին Ելենան, որը շարունակում է ամեն օր բախել 3պետական տարբեր պաշտոնյաների դռները։ 73-ամյա կինն այսօր ուզում է, որ նախկինում իրեն տրամադրված որոշման համաձայն՝բնակարան տրամադրեն, որպեսզի ստիպված չլինի դեգերել այստեղ-այնտեղ։

Թագուհի Հակոբյան