2026-ին առողջապահության նախարարության համար նախատեսել ենք 44 մլրդ 313 մլն դրամով ավելի հատկացնել, քան 2025 թվականին էր: Բյուջեն 2026-ին կկազմի 210 մլրդ 911 մլն դրամ: Այդ մասին ԱԺ մշտական հանձնաժողովների համատեղ նիստին ասաց ֆինանսների նախարար Վահե Հավհաննիսյանը առողջապահության նախարարության բյուջետային հատկացումները ներկայացնելիս:

«Ամենամեծ ավելացումներն ունենք առողջապահության նախարարության գծով, որը պայմանավորված է հաջորդ տարի առողջության համընդհանուր ապահովագրության համակարգի ներդրման հանգամանքով»,- ասաց նախարարը՝ հավելելով, որ ռեֆորմների հետ կապված ամենամեծ ներդրումն այստեղ է իրականացվում:

Անդրադառնալով 2026 թվականի հատկացումներին՝ առողջապահության նախարար Անահիտ Ավանեսյանը հայտարարեց՝ 2026 թվականի բյուջեն առողջապահության համար պատմական բյուջե է:

«Ես, իսկապես, շատ մեծ ուրախությամբ և հպարտությամբ եմ այսօր ներկայացնում, որ մեր Կառավարությունը, «Քաղաքացիական պայմանագիր» կուսակցությունն իր նախընտրական հիմնական խոստումներից մեկը, որը տեղ է գտել Կառավարության ծրագրի մեջ, ըստ էության, դրա իրացման ֆինանսական հատվածի առաջին հաստատումն իրականացրել է»,- ասաց նա:

Առողջության համընդհանուր ապահովագրության մասին փաթեթը, ըստ նախարար Ավանեսյանի, վերջնական որոշումների, նաև այսօրվա հաստատվելիք բյուջեի շրջանակներում վերջին շտկումների փուլում է, և առաջիկա օրերին այն կուղարկվի Կառավարության դիտարկմանը:

«Մեր նպատակն է, որ մինչև տարվա վերջ օրենքն ընդունենք, որպեսզի հաջորդիվ՝ 2026 թվականից, կարողանանք առաջին, մեկնարկային փուլը սկսել»,- ասաց նա: