Ռուսաստանում Հայաստանի Հանրապետության դեսպան Գուրգեն Արսենյանը, ըստ 168.am–ի` ՀՀ արտաքին գործերի նախարարությանը մոտ կանգնած աղբյուրների, խորհրդակցությունների նպատակով վերադառնում է Հայաստան։

Հիշեցնենք, մայիսի 4-ին Երևանում կայացած Եվրոպական քաղաքական համայնք հարթակի 8-րդ գագաթնաժողովից հետո՝ մայիսի 7-ին, Ռուսաստանի արտգործնախարարություն էր կանչվել դեսպան Գուրգեն Արսենյանը: Նա հանդիպել էր ՌԴ ԱԳ փոխնախարար Միխայիլ Գալուզինի հետ:

«Դիվանագիտական առաքելության ղեկավարին հայտարարվել է ԵՄ հովանու ներքո վերջին միջոցառումների շրջանակում Հայաստանում Կիևի նացիստական ռեժիմի պարագլուխ Վլադիմիր Զելենսկուն Ռուսաստանի հասցեին ահաբեկչական սպառնալիքներ հնչեցնելու համար «ամբիոն» տրամադրելու կատեգորիկ անընդունելիության մասին»,- ասված էր ՌԴ ԱԳՆ հաղորդագրությունում:

ՌԴ ԱԳՆ տարածած հայտարարությունում նաև ասվում էր, որ ՀՀ դեսպանի հետ հանդիպման ընթացքում ընդգծվել է, որ Մոսկվայում այդ կապակցությամբ արդարացի վրդովմունք են ապրում և պաշտոնական Երևանի կողմից պատշաճ բացասական գնահատականի բացակայությունը համարում են ռուս-հայկական հարաբերությունների գործընկերային բնույթին չհամապատասխանող:

Ըստ հաղորդագրության, դեսպանը խոստացել էր զեկուցել Երևան ռուսական կողմի ներկայացրած բողոքի մասին։

168․am-ի աղբյուրների փոխանցմամբ, Գուրգեն Արսենյանի՝ ՌԴ ԱԳՆ այցից հետո, խորհրդակցությունների նպատակով ՀՀ է գալու  դեսպան Գուրգեն Արսենյանը։

ՀՀ ԱԳՆ խոսնակ Անի Բադալյանը 168․am-ի հետ զրույցում ասաց, որ այս պահի դրությամբ այդ լուրը  չի համապատասխանում իրականությանը։

Այնուամենայնիվ, եթե այս այցը առաջիկայում դիվանագիտական այդպիսի ձևակերպում ստանա, դիվանագիտական նույն աղբյուրներից տեղեկացնենք, որ գործող դեսպանին մայրաքաղաք կանչելը դիվանագիտական պրակտիկայում համարվում է տվյալ երկրի վրա ճնշման լրջագույն միջոց։ Այն ավանդաբար ընկալվում է՝ որպես հյուրընկալ պետության որոշակի գործողությունների նկատմամբ ծայրահեղ դժգոհություն արտահայտելու ձև։ Խորհրդակցությունների համար դեսպանին կանչելը երկկողմ հարաբերությունների մակարդակն առժամանակ իջեցնելու պատրվակ է։ 

Այսպիսով, դեսպան Արսենյանը վերադառնում է Երևան` ԱԳՆ ղեկավարությանը կամ հենց Նիկոլ Փաշինյանին իրավիճակի մասին զեկուցելու և Հայաստանի հետագա քայլերը քննարկելու նպատակով։ Այս դեպքում, չի բացառվում, որ դեսպանի պարտականությունները դրվեն ժամանակավոր հավատարմատարի վրա։ Հավանաբար, առաջիկայում ականատես կլինենք հայկական և ռուսական կողմերի հետագա փոխհրաձգության թեժացմանը։

Հիշեցնենք, որ Ռուսաստանի հետ պատերազմի մեջ գտնվող Ուկրաինայի ղեկավար Վլադիմիր Զելենսկին Երևանում հայտարարել էր, որ Մոսկվայի ռազմական շքերթին կարող են «այցելել» ուկրաինական անօդաչու թռչող սարքեր։

«Այս տարի մայիսի 9-ին Ռուսաստանում չեն պլանավորում ռազմական տեխնիկա ցուցադրել շքերթի ժամանակ։ Սակայն դրան կարող են «այցելել» ուկրաինական անօդաչուները։ Այս ամառ Պուտինը որոշելու է՝ ինչ անել հետո՝ ընդլայնե՞լ պատերազմը, թե՞ գնալ դիվանագիտական ճանապարհով։ Մենք պետք է նրան դրդենք դիվանագիտության»,- ասել էր Ուկրաինայի նախագահը։