Ավելորդ քաշը կարող է մեծացնել ատամների կորստի ռիսկը, զգուշացրել է ատամնաբույժ Ջովիդ Զարիպովը: Այս մասին նա խոսել է «Известия»-ի հետ։

Զարիպովի խոսքով՝ ավելորդ քաշ ունեցող մարդկանց մոտ ճարպային հյուսվածքը արտազատում է նյութեր, որոնք առաջացնում են բորբոքում, ինչն էլ բարձրացնում է պարոդոնտիտի զարգացման վտանգը։ Բժիշկը նշել է, որ հենց այս հիվանդությունը մեծահասակների մոտ ատամների կորստի հիմնական պատճառներից է։

Բժիշկը հավելել է, որ ճարպակալումը մոտ 1.5 անգամ մեծացնում է ատամները կորցնելու ռիսկը։ Իսկ եթե մարդը նաև ծխում է, ապա այդ ռիսկը երեք անգամ ավելի բարձր է՝ համեմատած այն մարդու հետ, ով չի ծխում և ավելորդ քաշ չունի։

Ատամնաբույժ Անդրեյ Կիրյակովը նաև նշել է, որ ատամների խնդիրները կարող են պայմանավորված լինել ճարպակալմանը ուղեկցող այլ գործոններով։ Դրանց թվում նա նշել է 2-րդ տիպի շաքարային դիաբետը և բարձր ածխաջրային սննդակարգը։