Գեղարքունիքի մարզում ամեն ինչ գնալով քանդվում է։ Այս մասին Գեղարքունիքի մարզի բնակիչների հետ հանդիպման ընթացքում ասաց «Ուժեղ Հայաստան» կուսակցության առաջնորդ Սամվել Կարապետյանը։

Բերելով 2023-2025թթ․ վիճակագրական տվյալները, Կարապետյանը փաստեց, որ այս տարիների ընթացքում որևէ դրական ցուցանիշ չի արձանագրվել։ Մասնավորապես․ «2023-25 թվականի վերջը մարզում ծնունդները նվազել են 10 %-ով, դուք պատկերացնո՞ւմ եք՝ դա ինչ է նշանակում, մահացությունն ավելացել է 6 %-ով։ Բնական աճը նվազել է 30 %-ով։ Այսինքն՝ մարզի բնակչությունը նվազել է 30 %-ով, ընդամենը մի քանի տարվա ընթացքում։ Ամուսնությունները նվազել են 3 %-ով, ամուսնալուծություններն՝ աճել 16 %-ով։ Այս խնդիրը գալիս է վատ ապրելակերպից։ Ես ուզում եմ դուք լսե՛ք, ֆիքսե՛ք և ժողովրդին հետագայում բացատրեք, որ միայն բակում կամ ճամփին ասֆալտ տեսնելը , իմ ներկայացրած թվերի մեկ տոկոսը չարժե։

Անդրադառնալով Գեղարքունիքի մարզի տնտեսությանը, Սամվել Կարապետյանը նշեց, որ արդյունությունը նվազել է 2 %-ով, գյուղատնտեսությունը՝ 4 %-ով, շինարարությունը՝ 1 %-ով, աճել են միայն ծառայությունները՝ 0․1 %-ով։

«Այսինքն՝ գնալով ամեն ինչ քանդվում է։ Մարզում աղքատությունը 7 %-ով աճել է։ Մարզերն ահագնացող տեմպով են աղքատանում, այս պատճառով ոչ թոշակները, ոչ ապահովագրությունը չեն կարող մարդկանց օգնել՝ իրենց կենսամակարդակը բարձրացնելու համար։ Մենք, հասկանալով այս բոլոր պրոբլեմները, պետք է միասին ցուցաբերենք շատ մեծ հայրենասիրություն՝ կանգնեցնենք մեր երկիրը անդունդի եզրին կանգնեցրած այս թույլ, անկարող, անիմաստ իշխանությանը, որովհետև ոչ մի ասֆալտ մեզ պետք չի գալու, եթե այդ տարածքներում մարդիկ չապրեն»,- ասաց Կարապետյանը։