Ռուսաստանի Պրիմորիեի երկրամասում մանկապարտեզի դաստիարակչուհին դատապարտվել է այն բանից հետո, երբ նրա գործողությունների հետևանքով երեխաները աչքերի վնասվածքներ են ստացել, հայտնում է Past.am-ը՝ հղում անելով «ՌԻԱ Նովոստի»-ին։

Կինը մեղավոր է ճանաչվել Ռուսաստանի Դաշնության Քրեական օրենսգրքի 238-րդ հոդվածով, որը վերաբերում է անվտանգության պահանջներին չհամապատասխանող ծառայությունների մատուցմանը։

Քննության տվյալներով՝ միջադեպը տեղի է ունեցել մանկապարտեզում, որտեղ դաստիարակչուհին խախտել է անվտանգության կանոնները։ Նա, իմանալով, որ մարդկանց ներկայությամբ արգելվում է օգտագործել մանրէասպան բժշկական ճառագայթիչ, այն միացրել է խմբասենյակում և երեխաներին թողել առանց վերահսկողության։

Արդյունքում մի քանի երեխաներ ստացել են աչքերի եղջերաթաղանթի ջերմային այրվածքներ։

Դատարանը դաստիարակչուհուն մեղավոր է ճանաչել և դատապարտել մեկուկես տարվա պայմանական ազատազրկման։