Այսօր Արմավիրի մարզի Նորապատ գյուղում կենցաղային հարցերի շուրջ առաջացած վեճը վերածվել է դանակահարության ու կրակոցների։ Կա 3 զոհ։ Այս մասին հայտնում է ՀՀ ՆԳՆ ոստիկանության մամուլի ծառայությունը։

Նշվում է, որ այսօր` մայիսի 26-ին՝ ժամը 11։37-ին, շտապօգնությունից ՆԳՆ 112 օպերատիվ կառավարման կենտրոն հաղորդում է ստացվել, որ Արմավիրի մարզի Նորապատ գյուղի գերեզմանատանը վնասվածքներով անձինք կան։

«ՆԳՆ ոստիկանության օպերատիվ խմբերը նշված վայրում պարզել են, որ կենցաղային հարցերի շուրջ վիճաբանություն է եղել մի խումբ անձանց միջև, ինչի ընթացքում նրանցից մեկը դանակով հարվածներ է հասցրել 63-ամյա կնոջը։ Դրանից հետո 63-ամյա կնոջ որդին իր անունով հաշվառված որսորդական զենքով կրակոցներ է արձակել, ինչի հետևանքով 3 անձ մահացել է»,–ասվում է հաղորդագրության մեջ ։
Դեպքից հետո Նորապատի 38-ամյա բնակիչը ներկայացել է համայնքային ոստիկանության Արմավիրի բաժին, խոստովանել կատարածը և իրավապահներին հանձնել զենքը։

Դեպքի հանգամանքները պարզվում են։
ArmLur.am-ի տեղեկությունների համաձայն՝ սպանվածները մի ընտանիքից են` հայրը և 2 որդին։