«Ձեր հարցերին չեմ ուզում պատասխանել». Factor.TV-ի հարցերին ի պատասխան՝ վրա է եկել մի քանի երկրի քաղաքացի, օլիգարխ Սամվել Կարապետյանը, որը փորձում է Հայաստանի վարչապետի աթոռին հասնել:

Լրագրողի ճշտող հարցին, թե ինչո՞ւ, Կարապետյանը ի ցույց է դրել իր վախերը՝ հանիրավի լրագրողին մեղադրելով և պիտակավորելով:

«Որովհետև զգում եմ՝ դուք Փաշինյանի հետ փայ եք մտել, ուզում եք ամեն անգամ ինքը ինձ մեծ գումարներ կրի»,- ասել է ըստ իրավապահ մարմինների՝ ընտրակաշառքներ բաժանող նորելուկ քաղաքական ուժի ինքնահռչակ «վարչապետը»:

Լրագրողի արձագանքին, որ հարց ունի, թե՞ այսպես է ցանկանում դառնալ երկրի վարչապետ՝ խտրականություն դնելով լրագրողների նկատմամբ, Կարապետյանը համաձայնել է պատասխանել հարցին՝ ևս մեկ անգամ վախվորած ասելով. «Փաշինյանին կասեք՝ դատի չտա»: Այս պատասխանին կրկին խիստ տոնով արձագանքել է լրագրողը՝ ասելով. «Ես կորոշեմ իմ վարքագիծը և ասելիքն ու անելիքը», ապա հղել է հարցը:

«Ռուսական The Insider-ը (ոնց որ ձեզ շատ են սիրում) նորից հրապարակում է արել, ասում են, որ…». Կարապետյանը չի թողել, որ լրագրողը հարցն ավարտի՝ ցինիկաբար պատասխանելով, թե «դա ռուսական The Insider չի, հաշվեք «Հայկական ժամանակ»-ն է»: Ապա լրագրողը շարունակել է. «Ասում են՝ Սամվել Կարապետյանը Ֆրանսիայում վիլայի անվանական սեփականատեր է, որտեղ ապրել է Ալինա Կաբաևան, այն գնվել է «Գազպրոմ» բանկի միջոցոներով, ինչ-որ նոր հետաքննություն է ձեր մասին, ասելիք չունե՞ք այս մասով»:

Հայերեն բառերը մի կերպ իրար կապկպող օլիգարխը արձագանքել է՝ ասելով. «Շատ հետաքրքիր հետաքննություն է, ինչ ասեմ»: Արձաքանելով լրագրողը ասել է, որ կարդաց, ապա Կարապետյանը կրկին ցինիկացել է՝ պատասխանելով, թե «Լյուդովիկ 14-ն էլ է այդտեղ ապրել, կռիվ անե՞նք»:

Փաստացի լրագրողների հետ մի քանի րոպե շփված օլիգարխը ոչ միայն հանիրավի թիրախավորել է լրագրողներին և լրատվամիջոցներին, այլ նաև անուղղակի խոստովանել է, որ պարզագույն ստերի համար դատարաններում պարտվում է:

Վարչապետ Նիկոլ Փաշինյանը երկու հայց է ներկայացրել իշխանությունը զավթելու կոչերի համար տնային կալանքում գտնվող Կարապետյանի դեմ՝ «Փաշինյանը Չինաստանից 1 տոննա հալյուցինագեն սունկ է բերել հետը Հայաստան, ուտում է ամեն նիստից առաջ» հայտարարության և «Փաշինյանը Կանադայում տուն ունի, փախնելու է այնտեղ» հայտարարության համար: