Զորահանդեսները չեն կարող լիարժեք գնահատական տալ բանակի մարտունակությանը և մարտական պատրաստվածությանը։ Ռազմական տեխնիկան և սպառազինությունը պետք է գործնականում կիրառվեն զորավարժությունների ընթացքում։ Այս մասին «Հայաստան» դաշինքի նախընտրական հանրահավաքի ժամանակ հայտարարել է ՀՀ պաշտպանության նախկին նախարար, ԱԺ «Հայաստան» խմբակցության պատգամավոր Սեյրան Օհանյանը։

Անդրադառնալով մայիսի 28-ին անցկացված զորահանդեսին՝ Օհանյանը նշել է, որ անկախ ցուցադրված տեխնիկայից և սպառազինությունից, վերջին հինգ տարիներին Հայաստանում լայնածավալ զորավարժություններ գրեթե չեն անցկացվել։ Նրա խոսքով՝ ի տարբերություն Հայաստանի, Ադրբեջանը պարբերաբար կազմակերպում է ինչպես սեփական, այնպես էլ գործընկեր երկրների հետ համատեղ զորավարժություններ։

«Զորահանդեսի վերաբերյալ կան նաև մասնագիտական գնահատականներ։ Համազորային կանոնադրությունների տեսանկյունից որոշ տարրեր չէին համապատասխանում սահմանված չափանիշներին, իսկ ներկայացված ռազմական տեխնիկան ամբողջությամբ չէր արտացոլում Հայաստանի ռազմավարական զսպման ներուժը»,– նշել է Օհանյանը։

Նրա խոսքով՝ Հայաստանի զինված ուժերի ռազմավարական զսպման որոշ միջոցներ ձեռք են բերվել դեռևս նախկինում, սակայն գործող իշխանությունները չեն ցանկացել դրանք ներկայացնել հանրությանը։

Պաշտպանության նախկին նախարարը զորահանդեսը գնահատել է որպես քաղաքական միջոցառում՝ ընդգծելով, որ վարչապետ Նիկոլ Փաշինյանն իր ելույթում չի անդրադարձել Սարդարապատի, Բաշ Ապարանի և Ղարաքիլիսայի հերոսամարտերի նշանակությանը։

«Փաշինյանը չընդգծեց այդ հաղթանակների կարևորությունը։ Սակայն առավել մտահոգիչ է այն, որ գործող իշխանությունները բանակը փորձում են բաժանել նախկինների և ներկաների։ Բանակը որևէ կառավարության սեփականությունը չէ, այն ամբողջ ժողովրդի և պետության բանակն է»,– հայտարարել է Սեյրան Օհանյանը։

Վերադառնալով զորահանդեսի թեմային` Օհանյանի նշեց` նոր հրետանին դեռ գործարկված չէ։ Այդ մասին վկայում են զոհվածների հիշատակին Դ- 30– ներով համազարկ տալը։ Դե իսկ զորահանդեսի ժամանակ ավելի քան կարևոր էր նոր տեխնիկայով համազարկ տալը։