Դատախազը Մարտի 1-ի գործով հանրային քրեական հետապնդումներ է հարուցել 4 բանակային կորպուսների նախկին հրամանատարների նկատմամբ: Այս մասին տեղեկացնում են ՀՀ գլխավոր դատախազությունից:

Դատախազը 2026 թվականի հունիսի 1-ին 2008 թվականի մարտի 1-2-ին Երևան քաղաքում տեղի ունեցած իրադարձությունների վերաբերյալ նախաձեռնված քրեական վարույթի շրջանակում հանրային քրեական հետապնդում է հարուցել 2008 թվականի փետրվարի 23-ից մարտի 1-ի դրությամբ ՀՀ զինված ուժերի 4 բանակային կորպուսների հրամանատարների՝ Պ. Պ.-ի, Վ. Գ.-ի, Հ. Բ.-ի և Լ. Ե.-ի նկատմամբ՝ 18.04.2003 թվականին ընդունված Քրեական օրենսգրքի 38-309-րդ հոդվածի 3-րդ մասով (պաշտոնատար անձի կողմից պաշտոնեական լիազորություններն անցնելուն օժանդակելը, որն էական վնաս է պատճառել՝ առաջացնելով ծանր հետևանքներ):

Մասնավորապես Հակակոռուպցիոն կոմիտեում քննվող քրեական վարույթով տվյալներ են ձեռք բերվել այն մասին, որ ՀՀ զինված ուժերի 4 բանակային կորպուսների հրամանատարներ Պ. Պ.-ն, Վ. Գ.-ն, Հ. Բ.-ն և Լ. Ե.-ն (Պողոս Պողոսյան, Վալերի Գրիգորյան, Լևոն Երանոսյան), ակնհայտ ապօրինի հրաման կատարելով, իրենց կողմից արձակված հրամանների հիման վրա միջոցներ տրամադրելով և խոչընդոտներ վերացնելով, օժանդակել են նույն ժամանակահատվածում ՀՀ պաշտպանության նախարարի պաշտոնն զբաղեցրած Մ. Հ.-ի (Միքայել Հարությունյան) և մի շարք այլ բարձրաստիճան պաշտոնատար անձանց կողմից, այդ թվում՝ Մարտի 1-ի գործով մեղադրյալներ Ռ. Ք.-ի, Ս. Օ.-ի, Յու. Խ.-ի (Ռոբերտ Քոչարյան, Սեյրան Օհանյան, Յուրի Խաչատուրով) կողմից պաշտոնեական լիազորություններն անցնելուն: