Առողջապահական և աշխատանքի տեսչական մարմնի կողմից «ՌԻԽՏԵՐ-ԼԱՄԲՐՈՆ» Հ/Ձ ՍՊ ընկերությանը 2026 թվականի հունիսի 1-ին տրվել է շրջանառության դադարեցման և հետկանչի կարգադրագիր՝ «Սանովասկ (ացետիլսալիցիլաթթու), 75 մգ դեղահատեր թաղանթապատ, 30 (3×10) դեղահատեր բլիստերում» (արտադրող՝ Իրբիտսկի Քիմիադեղագործական գործարան ԲԲԸ) դեղի 90624 սերիայի վերաբերյալ։
Այս մասին տեղեկացնում են ԱԱՏՄ-ից:
Կարգադրագրի հիմք է հանդիսացել «Դեղերի և բժշկական տեխնոլոգիաների փորձագիտական կենտրոն» ՊՈԱԿ-ի կողմից 2026 թվականի մայիսի 29-ին ստացված թիվ 01/2822-26 գրությունը և կից փորձաքննության եզրակացությունը, համաձայն որի՝ առկա է հետկանչի ենթակա երկրորդ դասի թերություն. նմուշների լաբորատորային հետազոտությունների ժամանակ հայտնաբերվել է սպեցիֆիկացիայի սահմաններին անհամապատասխանություն՝ «հարակից խառնուրդ» կետով, ուստի վերոնշյալ դեղի 90624 սերիան ենթակա է շրջանառության դադարեցման և հետկանչի։
«Հարգելի՛ քաղաքացիներ, քանի որ առկա է հետկանչի ենթակա երկրորդ դասի թերություն, խնդրում ենք ուշադիր լինել և խուսափել վերոնշյալ սերիայով դեղի օգտագործումից»,- ասվում է հաղորդագրությունում:
#Հարգելի #քաղաքացիներ #խուսափեք #այս #դեղի #օգտագործումից #ՀՀ #առողջապահական #տեսչական #մարմին
