Բելառուսի նույն նախագահը, որ ասում էր՝ Հայաստանն ում է պետք, գնալու տեղ չունի, էսօր ընկած համոզում է, որ Հայաստանը դուրս չգա ԵԱՏՄ-ից։ Բայց Հայաստանը դուրս գալու խնդիր չի էլ դրել։ Մենք ուրիշ բան ենք ասում․ ես իմ մեծագույն խնդիրն եմ համարում, որ որևէ մեկը իրավունք և հնարավորություն չունենա ասելու, որ Հայաստանը որևէ մեկին պետք չէ։ Հայաստանը բոլորին է հարկավոր։
Այս մասին Մարտունիում քարոզարշավի ժամանակ ասել է վարչապետ Նիկոլ Փաշինյանը։
«Պատերազմի եռագլուխ կուսակցությունը խնդիր էր դրել, որ մենք Ռուսաստանի մեր գործընկերների հետ կոնֆլիկտի մեջ մտնենք։ Ես նաև Ռուսաստանի մեր գործընկերներին ասել եմ՝ մենք ձեզ հետ չենք կռվելու, չենք վիճելու, բանավեճի, լեզվակռվի մեջ չենք մտնելու, մենք հանգիստ, համբերատար մեր դիրքորոշումները պաշտպանելու ենք։ Մենք Ռուսաստանի Դաշնության շահերի դեմ չենք գործելու, բայց մենք նաև մեր շահերի դեմ չենք գործելու»,- ասել է Փաշինյանը։
Նիկոլ Փաշինյանն իր ելույթում նաև հայտնել է, որ Հայաստանում հունիսի 7-ին կայանալիք խորհրդարանական ընտրություններից հետո Մոսկվա կմեկնի և կհանդիպի Ռուսաստանի նախագահ Վլադիմիր Պուտինի հետ։
«Ռուսաստանի նախագահը հունիսի 1-ին զանգահարել էր իմ ծնունդը շնորհավորելու համար, բայց մենք նաև գործնական խոսակցություններ ունեցանք, և մենք պայմանավորվեցինք, որ ընտրություններից հետո ես նորից կմեկնեմ, հանդիպում կունենանք ու բոլոր ընթացիկ հարցերը կլուծենք»,- ասել է Փաշինյանը՝ անդրադառնալով Եվրասիական տնտեսական միությունում Հայաստանի շուրջ ստեղծված իրավիճակին և այդ համատեքստում Հայաստան-Ռուսաստան հարաբերություններում առկա զարգացումներին։
#Ռուսաստանի #նախագահի #հետ #պայմանավորվել #ենք #Փաշինյան
