«Հայաստան» դաշինքի վարչապետի թեկնածու Ռոբերտ Քոչարյանը կնոջ՝ Բելլա Քոչարյանի հետ քվեարկություն կատարեց Երևանի 7/3 ընտրատեղամասում։

«Քվեարկել եմ հանուն Հայաստանի՝ ազգային ինքնության, պաշտպանված, անվտանգ, բարեկեցիկ երկրի»,-քվեարկությունից հետո լրագրողների հետ ճեպազրույցում ասաց Քոչարյանը։

Նա ընդդիմության շանսերը բարձր գնահատեց. «Իսկապես ռադիկալ փոփոխություններ լինելու են։ Անցած անգամ, ուղղակի, մեր մանդատները բավարար չէին նպատակի հասնելու համար և եղել ենք ընդդիմություն, պայքարել ենք, ոչ մի տեղ չենք նահանջել»։

2-րդ նախագահը վստահեցրեց՝ երկրում բոլոր քաղաքացիները գաղտնալսվում են. «Եթե հաշտ եք այդ մտքի հետ, եթե ուրիշները հաշտ են այդ մտքի հետ, թող քվեարկեն այն ուժի համար, որը այս մթնոլորտը ստեղծեց։

Տեղաշոր են մտնում, խոհանոց են մտնում. խայտառակություն էր, այսպիսի բան չեմ հիշում, որ հարյուրավոր ընդդիմադիրների վրա քրեական գործեր, տնային կալանքներ լինեն»։

Վերահաստատեց՝ իրենց ձայները կտան ամենաշատ քվե ստացած ընդդիմադիր քաղաքական ուժի թեկնածուին։

Ռոբերտ Քոչարյանը՝ պատասխանելով հարցին, թե արդյոք Փաշինյանը հանգիստ կհեռանա՞, եթե ժողովուրդը որոշի, ասաց. «Եթե չգնա, շատ վատ է ավարտվելու»։

Մանրամասնեց՝ ամեն մեկը իր երևակայության սահմաններում թող հասկանա՝ ինչ է դա նշանակում։