Քաղաքագետ Ստյոպա Սաֆարյանի խոսքով՝ եթե Միացյալ Նահանգների նախագահը երկու երկրների (Հայաստան-Ադրբեջան) ղեկավարներին հրավիրել է Սպիտակ տուն, նշանակում է՝ կան երաշխիքներ, վստահություն, արված աշխատանք, որ ինչ-որ փաստաթուղթ ստորագրվելու է:

Վերջինիս դիտարկմամբ՝ սրանով Միացյալ Նահանգները մի քանի խոշորագույն խնդիր է փորձում լուծել. առաջինը՝ վերացնել Ադրբեջանի «մահանաները» և մտահոգությունները, այն իմաստով, որ եթե խաղաղության խնդիրն է, ուրեմն պայմանագիրը պատրաստ է, ստորագրեք: Երկրորդը՝ ԱՄՆ նախագահը հանդես է եկել «Թրամփի կամրջի» գաղափարով, որը վերաբերում է ՀՀ-ի առաջարկած Խաղաղության խաչմերուկին:

Միաժամանակ Սաֆարյանը նկատում է՝ կարևոր է ևս մեկ բան. շատերը հակված են սա դիտարկել որպես ՀՀ-Ադրբեջան պրոբլեմների լուծում, սակայն սրան պետք է նայել ՀՀ-ԱՄՆ հարաբերությունների համատեքստում. «Այստեղ կան և՛ անձնական, և՛ երկրների շահեր․ մեր շահը ապաշրջափակումն է»:

Քաղաքագետն ասում է՝ Ռուսաստանի համար սա տհաճ անակնկալ էր, որ Հայաստանն այլընտրանք ունի:

Նա նաև նկատում է՝ եթե Ադրբեջանը գնում է Վաշինգտոն, նշանակում է, որ նա էլ է հետ կանգնել Նոյեմբերի 9-ի հայտարարությունից. «Սրանով շատ հավանական է՝ Ռուսաստանը դուրս մնա տարածաշրջանից»:

Այս համատեքստում, սակայն, Սաֆարյանը ուշադրություն է հրավիրում այն հանգամանքին, որ ռուսական հակազդեցություն կլինի:

Ինչ վերաբերում է Իրանին, զրուցակիցը կարծիք է հայտնում. «Դժվար է ասել՝ Իրանի արձագանքը որը կլինի․ դատելով իրանական պաշտոնյաների հայտարարություններից՝ նրանք հավատում են հայկական կողմին: Իրանի համար կարևոր է, որ հայ-իրանական սահմանին չկանգնեն երրորդ երկրի ռազմական ուժեր․ Թրամփի առաջարկով դա չի լինելու»:

Առավել մանրամասն՝ «Հայկական ժամանակ»-ի հետ հարցազրույցում: