Խորհրդարանական ընտրություններին մնացել է ինը ամիս, և թեժ պայքարի ծիլերն արդեն երևում են. դաշտի հնաբնակ խաղացողների կողքին հայտնվում են նորերը, որոնք ևս բավականին լուրջ ակնկալիքներ ունեն՝ ընդհուպ Փաշինյանին իշխանությունից միանձնյա հեռացնելու։

Այս ամենի ֆոնին մամուլը գրում է, որ ընդդիմությունն, ամեն դեպքում, անհանգստանալու առիթ ունի, քանի որ ինչքան էլ իրենք արդեն իսկ պայքարի մեջ են, այնուամենայնիվ, սոցիոլոգիական հարցումները ցույց են տալիս, որ Փաշինյանի ընկած վարկանիշից էլ ցածր է այս պահին իր վարկանիշը։ Արդյո՞ք այս պահին արված սոցիոլոգիական հարցումների վրա կարելի է հենվել, թե՞ դեռ վաղ է որևէ վերլուծություն անել. այս և այլ հարցերի շուրջ MediaHub-ը զրուցել է քաղտեխնոլոգ Արմեն Բադալյանի հետ։

«Ինը ամիս առաջ եղած տվյալները չի կարելի դիտարկել ու եզրակացություն անել, քանի որ ինը ամսվա ընթացքում ահռելի մեծ փոփոխություններ կարող են տեղի ունենալ և հաստատ տեղի են ունենալու։ Բացի այդ, Հայաստանը բարձր մակարդակի ինքնիշխան պետություն չի, որ իշխանությունների ձևավորման գործընթացը կայանա ընտրական մեխանիզմի միջոցով՝ զուտ հենվելով ընտրողների ազատ կամարտահայտության վրա։ Հայաստանի վրա էական ազդեցություն են ունենալու արտաքին գործոնները՝ ԵՄ, ՌԴ և Իրան, որոնք էլ էական փոփոխություն կարող են մտցնել քաղաքական համայնապատկերում, ու ընդհանրապես կապ չունի՝ իշխանությունն ու ընդդիմությունը դա ուզում են, թե ոչ»,- նշեց քաղտեխնոլոգը։

Նրա խոսքով՝ անգամ եթե սոցիոլոգիական հարցումներն ինչ-որ պատկեր են ստեղծում, չպետք է ամբողջապես հավատալ այդ ամենին, քանի որ այդ հարցումներն ունեն մանիպուլյատիվ բնույթ, այսինքն՝ ոչ թե իրական պատկերն են ցույց տալիս, այլ շահագրգիռ կողմի ցանկությունները։

«Այսինքն՝ երեք գործոն հստակ պետք է հաշվի առնել. առաջին՝ դեռ վաղ է խոսել ընտրությունների պատկերից, երկրորդ՝ արտաքին ուժերի գործոնը պետք է հաշվի առնել և երրորդ՝ սոցիոլոգիական հարցումներին չպետք է անվերապահ հավատալ»,- նկատեց նա։

Հարցին, թե արդյո՞ք հնարավոր է այս պահի դրությամբ որևէ պատկերացում կազմել, թե ինչ փոփոխություն կարող է լինել քաղաքական դաշտում ամիսներ անց, եթե հաշվի առնենք, որ նոր քաղաքական ուժեր են ձևավորվում, որոնք հստակ հայտարարել են՝ եկել են, որ հաղթեն, Արմեն Բադալյանը պատախանեց՝ այս պահին հստակ է, որ ապագա խորհրդարանում հայտնվելու համար պայքարի մեջ են երեք հիմնական ուժեր. ՔՊ-ն՝ Փաշինյանի գլխավորությամբ, երկրորդ նախագահի գլխավորած ուժը և Սամվել Կարապետյանի ստեղծած քաղաքական նոր միավորը։

«Այս երեք ուժերից մեկն ամեն գնով փորձում է պահել իշխանությունը, մյուս երկուսն էլ ամեն գնով փորձելու են վերցնել իշխանությունը։ Բայց կան նաև երկրորդ լիգայի խաղացողներ, որոնք մասնակցելու են խորհրդարանական ընտրություններին, որ մի քանի տեղ ունենան ԱԺ-ում։ Կա նաև երրորդ լիգա, որտեղ տեղակայված ուժերն ամեն գնով փորձելու են ձայներ խլել առաջին լիգայում խացացող ուժերից»,- ամփոփեց խոսքը Արմեն Բադալյանը։