Ալիևը հող է նախապատրաստում հարձակման համար, ժամանակ չունենք, գործ արե՛ք․ Էդմոն Մարուքյան

Երկու օր առաջ Փաշինյանը հրապարակեց ամիսներ առաջ Հայաստանի կողմից Ադրբեջանին ներկայացված առաջարկը, որը վաղուց մերժվել էր Ալիևի տարբեր պաշտոնյաների կողմից։ Այս մասին գրում է «Լուսավոր Հայաստան» կուսակցության նախագահ Էդմոն Մարուքյանը։

«Հրապարակումից անմիջապես հետո Ադրբեջանի ԱԳՆ խոսնակը արձագանքեց Հայաստանի վարչապետի հոդվածին հայտարարելով. 

«Եթե Հայաստանն իսկապես հետաքրքրված է կոմունիկացիաների բացմամբ, չպետք է իր պարտավորություններից խուսափի և կոմունիկացիաների բացման գործում պետք է գործնական քայլեր կատարի՝ տարածաշրջանում նոր իրողություններին համապատասխան»։

Այսպիսով, ևս մեկ անգամ փաստում ենք, որ նոյեմբերի 9-ի հարթակին վերադարձն, ուղղակի, չունի այլընտրանք։ Նաև այս օրերին ակտիվորեն շրջանառվում է Ադրբեջանական բանտերում պատանդի կարգավիճակում գտնվող ՀՀ քաղաքացիների հարցը։ Նրանց խնդիրն ևս կարող է քննարկվել նոյեմբերի 9-ի եռակողմ հարթակում։

Իհարկե, կարելի է շարունակել արհեստականորեն ձգձգել գործընթացը, մի քիչ փոփոխել առաջարկը ու էլի ուղարկել Բաքու, հետո էլի մերժեն, մի այլ առաջարկ պատրաստել և այդպես մինչև տեղի ունենա հերթական էսկալացիան։ Ի դեպ, հենց դրա մասին էր երեկ խոսում ԱԺ նախագահը՝ հայտարարելով, որ իբր էսկալացիայի վտանգ կա, բայց դրա առիթը չկա…

Բազմիցս ասել եմ՝ սա շատ նման է 2019 թվականի խաղաղության պլանի մերժմանը։ Այսօր դարձյալ խաղաղության պլանը մերժվում է ճիշտ այնպես, ինչպես այն մերժվել է 2020թ. պատերազմից առաջ։

Ի դեպ երեկ էլ Ադրբեջանի ՊՆ-ն կեղծ հաղորդագրություն է տարածել, թե իբր ՀՀ ԶՈՒ ստորաբաժանումները կրակ են բացել սահմանագոտու հարավարևելյան հատվածում տեղակայված ադրբեջանական դիրքերի ուղղությամբ։

Ալիևը հող է նախապատրաստում հարձակման համար… 

Ժամանակ չունենք, գործ արե՛ք»։