Որոնք են այն 3 կարևոր բարեփոխումները, որոնք իրականացնելու դեպքում առաջիկա 5 տարվա ընթացքում հնարավոր կլինի մոտենալ ավելի կայուն, ինստիտուցիոնալ ժողովրդավարության հաստատմանը Հայաստանում:

Ժողովրդավարության հայկական ֆորումի շրջանակում կազմակերպված պանելային քննարկման ժամանակ ատասխանելով հարցին՝ վարչապետ Նիկոլ Փաշինյանն ասաց՝ դա նոր Սահմանադրության ընդունումն է, որտեղ ամենակարևոր ինստիտուցիոնալ խնդիրը պետք է լուծվի: Դա դատական իշխանության օրգանիկ կապի ստեղծումն է ժողովրդի հետ:

«Դատական իշխանության գործընկերների և իրավաբանական հանրության ներկայացուցիչների հետ շփումների ընթացում անընդհատ այդ հարցն է քննարկում, որ իշխանությունը պատկանում է ժողովրդին, և ցանկացած իշխանություն պետք է բխի ժողովրդից:

Ես այսօր տեսնում եմ մի հատ լուրջ, լրջագույն համակարգային պրոբլեմ, որ ՀՀ-ում դատական իշխանությունը չի բխում ժողովրդից: Դատական իշխանությունը ոչ միայն չի բխում ժողովրդից, այլև ընդհանրապես կտրված է ժողովրդից և նրա հետ ոչ մի օրգանական կապ չունի:

Ճիշտն ասած, վերջերս ինձ համար մի շատ անսպասելի լավ լուր եղավ, երբ ես հասկացա, որ նոր Սահմանադրության համատեքստում որոշակի փոփոխություններ, առաջարկներ են գեներացվում, որոնք, իմ կարծիքով, այդ խնդիրը լրջորեն պիտի լուծեն: Մյուս առաջարկը գեներացվել է քաղաքական թիմում. խոսքը Հայաստանում երդվյալ ատենակալների ինստիտուտի ներդրման մասին է, որպեսզի մենք այս պրոբլեմից ի վերջո ազատվենք: Քանի դեռ մենք այս հարցը չենք լուծել, մենք ֆունդամենտալ շատ հարցեր չենք լուծելու: Իմ կարծիքով՝ մեր ժողովրդավարության մեծագույն պրոբլեմն այստեղ է»,- ասաց նա:

Ըստ վարչապետի՝ արդարադատության ստանդարտը կարևորագույն ստանդարտ է, որը պետք է արդարադատությունը մաքսիմալ կանխատեսելի դարձնի և արդարադատությունը պակաս օգտագործելի դարձնի քաղաքական շահերի սպասարկման համար:

«2018-ի հեղափոխությունից հետո այն փաստը, որ իշխանությունը հայտարարել է, որ գործ չունի դատական համակարգի հետ, Հայաստանում և Հայաստանի տարածքից դուրս բազմաթիվ ձեռքեր շփվել են: Ասել են. «Ի՜նչ լավ է, իշխանությունը գործ չունի դատական համակարգի հետ, հիմա մենք գործ կունենանք դատական համակարգի հետ»: Եվ ես ասում եմ՝ այո՛, բազմաթիվ որոշումներ թելադրվել են կոնկրետ շրջանակների կողմից, այդ թվում՝ Հայաստանից դուրս գտնվող:

Ռեֆորմները, որ պետք է արվեն, նոր Սահմանադրության ընդունումն է, որը, ի դեպ, օրգանական կապ պետք է ստեղծի ժողովրդի և իրավակարգի միջև:

Այսօրվա Սահմանադրությունը, սկսած 1995 թվականից, ոչ մի սահմանադրական հանրաքվեում ժողովրդի 50+1 տոկոսը չի գնացել և Սահմանադրության օգտին չի քվեարկել: Սա կարող է թվալ քաղաքական հարց: Դա քաղաքական հարց է, բայց այստեղ կա նաև օրգանական հարցը: Օրգանական հարցն այն է, որ Հայաստանում հաստատված իրավակարգը ժողովուրդն իրենը չի համարում, որովհետև չի համարում, որ ձեռք է բերել պայմանավորվածություն, որ ներհայաստանյան կյանքում մենք ապրում ենք այս կանոններով:

Այսօրվա Հայաստանի Սահմանադրությունը և իրավակարգը նույնքան ատելի է մեր ժողովրդի համար, ինչքան ատելի է եղել նախկինում Խորհրդային Միության կողմից, դրանից առաջ՝ Ռուսական կայսրության կողմից, դրանից առաջ՝ Օսմանյան կայսրության կողմից, դրանից առաջ՝ Պարսկական կայսրության կողմից իրեն պարտադրված օրակարգը, որովհետև այն ժամանակ էլ, հիմա էլ համարում է, որ ինչ-որ մարդանց խումբ իրեն պարտադրել է այդ իրավակարգը»,- ասաց Փաշինյանը: