ԱԺ «Քաղաքացիական պայմանագիր» խմբակցության պատգամավոր Ալխաս Ղազարյանը «Ֆեյսբուք»-ի իր էջում անդրադարձել է Վարդան Ղուկասյանի հայտարարություններին, որոնք Գյումրու քաղաքապետն արել է Փարաքարի համայնքապետի սպանության վերաբերյալ:

«Վարդանիկը իր ծառայամիտ տեսակով փորձում է քաղաքականացնել Փարաքարում տեղի ունեցածը՝ հայտարարելով, թե իբր ժողովրդի կողմից ընտրված համայնքապետերը թիրախավորված են՝ իրեն ևս համարելով ժողովրդի կողմից ընտրված։

Վարդանիկին հիշեցնեմ, որ եթե ինքն իրեն համարում է ժողովրդի կողմից ընտրված, թող բացի թվերը և տեսնի, թե իրականում որքան ձայն է ստացել։

Ժողովրդին «ֆռռացնելու» միջոցով Գյումրիում իշխանություն զավթած քաղաքական շառլատանը, ով իր «կաշին փրկելու» համար նույնիսկ պատրաստ է ՀՀ պետականությունը հանձնել, շահարկում է Փարաքարի համայնքապետի սպանությունը՝ դարձյալ իր նեղ անձնական շահերից ելնելով։

Ցավակցում եմ Վոլոդյա Գրիգորյանի և Կարեն Աբրահամյանի ընտանիքների անդամներին այս ողբերգական դեպքի կապակցությամբ և ընդգծում, որ ցանկացած նման դեպք խիստ դատապարտելի է, և իրավապահները պետք է ամեն ինչ անեն այն բացահայտելու համար։

Իսկ նրանք, ովքեր այս ողբերգությունը շահարկում են իրենց նեղ անձնական և քաղաքական շահերից ելնելով, այս սպանության շահառուներն են՝ առնվազն քաղաքական առումով»,- գրել է պատգամավորը։

Ավելի վաղ հայտնել էինք, որ ժամը 23։52-ին ՆԳՆ ոստիկանություն ահազանգ է ստացվել, որ Արմավիրի մարզի Մերձավան բնակավայրի Երևանյան խճուղում կրակոցներ են հնչել։ Նախնական տվյալներով՝ կան 2 զոհ, 1 վիրավոր։

Մահացածներից մեկը համայնքի ղեկավար Վալոդյա Գրիգորյանն է։

Վարչապետ Նիկոլ Փաշինյանը խստորեն դատապարտել է տեղի ունեցածը և ընդգծել. «ՀՀ իրավապահները պարտավոր են շուտափույթ բացահայտել հանցագործության մեջ ներգրավված բոլոր անձանց»։