Ժողովրդավարությունը Հայաստանում վստահելի ձեռքերում է, և խոսքն այս դեպքում ոչ թե Կառավարության, ոչ թե կառավարող մեծամասնության, ոչ թե քաղաքացիական հասարակության, այլ ժողովրդի մասին է, ՀՀ քաղաքացիների: Այդ մասին ԵԽԽՎ-ում իր ելույթի ժամանակ ասաց ՀՀ վարչապետ Նիկոլ Փաշինյանը:

Ըստ վարչապետի՝ ժողովրդավարությունը քայքայելուն ուղղված այն գործիքները կիրառվեցին ՀՀ-ում ժողովրդավարության համար ամենախոցելի շրջանում՝ 2020 թվականի 44-օրյա պատերազմից անմիջապես հետո, երբ ՀՀ-ում «քաղաքական խոր ճգնաժամ» էր առաջացել, և ըստ Փաշինյանի՝ 44-օրյա պատերազմը ինչ-որ առումով նաև հիբրիդային պատերազմի մաս էր, որի թիրախում ՀՀ պետականությունն էր ու անկախությունը:

«Հենց ժողովրդավարությունն էր, որ, բառիս բուն իմաստով, փրկեց ՀՀ պետականությունը և անկախությունը: Պատերազմը և դրան ողեկցող ապատեղեկատվությունն այն գործիքներն էին, որոնցից օգտվելով՝ հակաժողովրդավարական ուժերը մեզնից պահանջում էին պարզապես իշխանությունը հանձնել իրենց: Մենք ասացինք, որ ժողովրդից ստացած իշխանությունը չենք կարող հանձնել որևէ մեկին, այլ կարող ենք միայն ժողովրդին վերադարձնել»,- ասաց նա՝ միաժամանակ հիեշեցնելով, որ դրանից հետո՝ 2021-ին, իշխող ուժը Փաշինյանի գլխավորությամբ հրաժարական տվեց, բայց կրկին ընտրվեց:

«Սա տեղի ունեցավ մի հիմնական պատճառով. ժողովուրդը հասկացավ, որ այդ ընտրությունն է, որ երաշխավորելու է իր՝ ժողովրդի իշխանությունը Հայաստանում: Այսինքն՝ մեզ մանդատ տվեց իր իշխանությունը և ինքնիշխանությունը, անկախությունն ու պետականությունը պահպանելու համար:

Եվ կարող եմ միանշանակ և աներկբա արձագանքել, որ այսօր, այո՛, իշխանությունը ՀՀ-ում պատկանում է ժողովրդին, որը Հայաստանում ժողովրդավարության երաշխավորն է, և ՀՀ-ն այսօր ավելի անկախ է, քան երբևէ, ավելի պետություն է, քան երբևէ, ավելի ինքնիշխան է, քան երբևէ, ավելի ժողովրդավար է, քան երբևէ»,- ասաց նա:

Փաշինյանը նաև ընդգծեց, որ 2021-ի խորհրդարանական ընտրությունների ժամանակ ժողովրդի նախընտրական ծրագրի առաջին կետը խաղաղությունն էր, ինչն իշխող ուժը որդեգրեց որպես պատգամ, որպես պարտավորություն:

«Այսօր Հայաստանի և Ադրբեջանի միջև խաղաղություն է հաստատված: Չեմ կարող ասել, որ դա միայն Հայաստանի ձեռքբերումն է, դա նաև Ադրբեջանի կառավարության և Ադրբեջանի ժողովրդի ձեռքբերումն է: Եթե այսպես չլիներ, խաղաղություն չէր լինի»,- ասաց նա: