ԿԳՄՍ նախարար Ժաննա Անդրեասյանը քաղաքացիական հայց է ներկայացրել ընդդեմ ՀՀ ԳԱԱ Հայոց ցեղասպանության թանգարան ինստիտուտի նախկին տնօրեն Հայկ Դեմոյանի՝ զրպարտություն պարունակող հրապարակումները հրապարակայնորեն հերքել պարտադրելու, ներողություն խնդրելուն պարտադրելու, պատվին, արժանապատվությանը և գործարար համբավին պատճառված ոչ նյութական վնասը հատուցելու մասին։ Այս մասին civic.am-ը տեղեկացավ «Դատալեքս» հարթակից։ Թե մասնավորապես Դեմոյանի ո՞ր հայտարարությունների համար է Անդրեասյանը դատի տվել վերջինիս՝ հայցապահանջում հստակեցված չէ։

Նկատենք, որ օգոստոսի վերջին Դեմոյանը ֆեյսբուքյան գրառմամբ պահանջել էր նախարարի հրաժարականը՝ նրան մասնավորապես մեղադրելով վերանորոգման փուլում գտնվող Հայոց ցեղասպանության հուշահամալիրին «վնաս հասցնելու», «հանցավոր անփութություն ու դիտավորություն ցուցաբերելու» և այսպիսով «Հայոց ցեղասպանության զոհերի հիշատակը պղծելու» մեջ։

Նշենք, որ Դեմոյանի դեմ հայցեր են ներկայացրել նաև ԱԳ նախարար Արարատ Միրզոյանն ու Վլադիմիր Վարդանյանը, պահանջում են զրպարտություն համարվող տվյալների հերքում և փոխհատուցում։