«Քաղաքացիական պայմանագիր» խմբակցության պատգամավոր Տիգրան Պարսիլյանը «Ֆեյսբուք»-ի իր էջում գրառում է արել և նկատել.

«Ինչքան բովանդակազուրկ լինի ղեկավարածդ շարժումը ու դրա անունը, որ լրագրողը հարցնի իմաստի մասին, դու խոսես տառերի քանակի մասին, իսկ երբ պնդեն, որ տառերի քանակը բովանդակություն չէ, ասես՝ «ամեն մեկը իր ձևով»։

Ա՛յ հոպարի անուշ տղա, ախր դա արդեն «մեր ձևով չէ», «իմ ձևով» է, շարժումն էլ շարժում չէ, այլ քաոս, օրակարգն էլ օրակարգ չէ, այլ «մարդս մի բան անենք՝ տեսնենք ինչ կլինի»:

Լավ, առանց ասելիքի էսքան խոսալ կլինի»:

Նկատենք՝ Նարեկ Կարապետյանը Factor.TV-ի լրագրողի դիտարկմանը, որ «չեք կարծում՝ հասարակության հետ շատ եք բարդ լեզվով խոսում՝ «մեր ձևով», «կգրոհենք Հայաստանը», ինչո՞ւ պարզ չեք խոսում, որ հանրությունն իմանա՝ ինչ նկատի ունեք, արձագանքել էր՝ ասելով. ««Մեր ձևով» 6 կամ 7 տառ է, դրանից պարզ լեզո՞ւ»: Լրագրողի հակադարձմանը, որ բովանդակությունը պարզ չէ, Կարապետյանն ասել էր. «Մենք մի քանի անգամ ասել ենք, որ յուրաքանչյուր մարդ ունի իր ձևը»: Այնուհետև լրագրողը հակադարձել էր. «Դուք ասում եք՝ «հայավարի», ձեր հորեղբոր տղան ասում է՝ «ազատության սլոգան է»: Կարապետյանն էլ նշել էր, թե ամեն մարդ ունի իր պատկերացումը, իր ձևը. «Ձեր ձևը ո՞րն է, Նարե՛կ ջան, բարդ հարցեր տա՞լը»: