Կառավարությունն այսօրվա նիստում ընդունել է որոշում, որի համաձայն նախակրթարան հաճախելու տարիքային շեմը նվազեցվում է մինչև 4 տարեկան։

Նախագծին կից հիմնավորման համաձայն կատարված փոփոխությունը հնարավորություն կտա ընդլայնել նախադպրոցական կրթության հասանելիությունը և մեծացնել երեխաների ընդգրկվածությունը համակարգում։ Մասնավորապես, այն բնակավայրերում, որտեղ նախադպրոցական հաստատություններում առկա է հերթագրված երեխաների մեծ թիվ, ընդունելության հնարավորությունը կընդլայնվի՝ սկսած 4 տարեկանից։ Այն համայնքներում, որտեղ գործում է միայն նախակրթական մեկ հաստատություն, կստեղծվի այլատարիք խմբերի ձևավորման հնարավորություն։ Փոքր բնակավայրերի համար, որտեղ նախադպրոցական տարիքի երեխաների սակավ թվով պայմանավորված՝ առանձին մանկապարտեզների կառուցումը տնտեսապես նպատակահարմար չէ, այս մոտեցումը կիրառելի է։

Կարգավորման նպատակն է ոչ միայն ավելացնել երեխաների ընդգրկվածությունը, այլև ապահովել 5-6 տարեկան երեխաների պարտադիր նախադպրոցական կրթության լիարժեք իրականացումը։

https://www.facebook.com/Iravabannet/posts/pfbid02raZZiKdH96KHrmgXmTFTsB8mua6gA2raswSKMgCNC2oMT21EofsEzhi4fEn87hKal