Հռոմի պապ Ֆրանցիսկոսը մահացել է․ Հայտնի է դարձել ինչ առողջական խնդիրներ է ունեցել նա
Հռոմի պապ Ֆրանցիսկոսը մահացել է։ Այս մասին հաղորդել է Reuters գործակալությունը՝ վկայակոչելով Վատիկանի պաշտոնական աղբյուրները։
Հայտարարության համաձայն, Վատիկանի կամերլենգո, կարդինալ Քևին Ֆարելը երկուշաբթի առավոտյան տեղեկացրել է, որ պապ Ֆրանցիսկոսը մահացել է 88 տարեկանում։
Նա նշել է, որ «Այս առավոտ ժամը 7:35-ին Հռոմի եպիսկոպոս Ֆրանցիսկոսը վերադարձավ Հոր տուն։ Նրա ողջ կյանքը նվիրված էր Տիրոջ և Նրա Եկեղեցու ծառայությանը։»
Ֆարելը շարունակել է, որ պապը մեզ սովորեցրեց ապրել Ավետարանի արժեքներով՝ հավատարմությամբ, քաջությամբ և համընդհանուր սիրով, հատկապես ամենաաղքատների և ամենամարգինալացվածների հանդեպ։
Պապ Ֆրանցիսկոսը 88 տարեկան էր։ Փետրվարին նա բուժման էր ենթարկվել Հռոմի «Ջեմելլի» կլինիկայում՝ բրոնխիտի պատճառով, սակայն այնտեղ նրան նաև թոքաբորբ է հայտնաբերվել։
Հիվանդանոցում անցկացրած հինգ շաբաթների ընթացքում նա տառապել է չորս շնչառական ճգնաժամերից, որոնցից երկուսը լուրջ սպառնալիք են եղել նրա կյանքին։
Մարտի 23-ին դուրս գրվելուց հետո Պապը միայն մեկ անգամ է հրապարակավ հայտնվել, սակայն շարունակել է կատարել սահմանափակ պարտականություններ՝ ընդունելով հյուրեր, այդ թվում Մեծ Բրիտանիայի թագավոր Չարլզ III-ին և ԱՄՆ փոխնախագահ Ջեյ Դի Վենսին։
Զատկի պատարագը, որ տեղի է ունեցել Սուրբ Պետրոսի հրապարակում, չկատարվեց Պապի մասնակցությամբ, այն մատուցեց կարդինալ Անջելո Կոմաստրին։
