Iravaban.net-ը ուսումնասիրել է Իրավական ակտերի նախագծերի հրապարակման e-draft.am հարթակում հանրային քննարկման ներկայացված՝ կրթության, գիտության, մշակույթի և սպորտի նախարարության կողմից մշակված «Կրթության, գիտության, մշակույթի և սպորտի նախարարի 2021 թվականի հոկտեմբերի 11-ի N 76-Ն հրամանում փոփոխություններ և լրացումներ կատարելու մասին» Կրթության, գիտության, մշակույթի և սպորտի նախարարի հրամանի նախագիծը, որով առաջարկվում է նախադպրոցական ուսումնական հաստատություններ հերթագրման և ընդունելության գործընթացն իրականացնել էլեկտրոնային եղանակով՝ ապահովելով համապատասխան համակարգերի փոխգործելիությունը: Արդյունքում կբացառվի ծնողների կողմից հաստատություններ այցելելու և փաստաթղթերը կրկնակի ներկայացնելու անհրաժեշտությունը: Հրամանն ուժի մեջ կմտնի 2027 թվականի օգոստոսի 20-ին:

Ներկայում գործող իրավակարգավորման համաձայն՝ նախադպրոցական ուսումնական հաստատություն երեխայի ընդունումն իրականացվում է հերթագրման միջոցով՝ տեղական ինքնակառավարման մարմինների կողմից վարվող էլեկտրոնային համակարգերի միջոցով, իսկ դրանց բացակայության դեպքում՝ թղթային եղանակով։

Հերթագրման համար երեխայի ծնողը կամ օրինական ներկայացուցիչը ներկայացնում է անհրաժեշտ փաստաթղթերն ու տվյալները, որոնք կրկնակի ներկայացվում են նաև երեխայի ընդունման փուլում։ Միաժամանակ, երեխայի ընդունումից հետո մեկ աշխատանքային օրվա ընթացքում հաստատության տնօրենը կամ լիազորված աշխատակիցը պարտավոր է տվյալները մուտքագրել «Նախադպրոցական կրթության կառավարման տեղեկատվական համակարգ՝ վարչական ռեգիստր», ինչը ստեղծում է լրացուցչ ծանրաբեռնվածություն՝ հատկապես սաների մեծ համակազմի դեպքում։

Վերջին տարիներին ներդրված էլեկտրոնային կառավարման գործիքները և միասնական թվայնացված միջավայրը նպատակ ունեն նվազեցնել քաղաքացիների վարչական բեռը՝ բացառելով նույն տվյալների բազմակի ներկայացման անհրաժեշտությունը և ապահովելով տվյալների փոխգործելիություն պետական համակարգերի միջև։

Միաժամանակ, նախադպրոցական կրթության ոլորտում հավաստի վիճակագրական տվյալների հավաքագրման և միասնական քաղաքականության ապահովման նպատակով որոշվել է, որ 2026 թվականից վարչական ռեգիստրի վարումը կիրականացնի Կրթության, գիտության, մշակույթի և սպորտի նախարարությունը։

Այս համատեքստում առաջարկվող նախագծով նախատեսվում է նախադպրոցական ուսումնական հաստատություններում երեխաների հերթագրումն իրականացնել բացառապես էլեկտրոնային եղանակով՝ համայնքների կողմից վարվող համակարգերի միջոցով՝ ապահովելով դրանց լիարժեք փոխգործելիությունը «Կրթության կառավարման տեղեկատվական համակարգի» հետ։

Արդյունքում կբացառվի ծնողների կողմից հաստատություններ այցելելու և փաստաթղթերը կրկնակի ներկայացնելու անհրաժեշտությունը։ Տվյալները մեկ անգամ մուտքագրվելուց հետո հասանելի կլինեն բոլոր համապատասխան կառույցներին։

Երեխայի հերթագրման ժամանակ ծնողը կցում է՝

1) լուսանկար՝ 3×4 չափսի.

2) երեխայի բժշկական հսկողության ամբուլատոր քարտից քաղվածք.

3) երեխայի՝ կրթության և զարգացման առանձնահատուկ պայմանների կարիքի դեպքում՝ տարածքային մանկավարահոգեբանական կենտրոնի կողմից տրված եզրակացություն.

4) սույն կարգով սահմանված առաջնահերթություններից օգտվելու իրավունքը հավաստող փաստաթղթերը:

Նախագծի կարգավորումներին կարելի է ծանոթանալ հետևյալ հղմամբ՝ տեղեկացնում է Iravaban.net-ը։