Ապրիլի 29-ին «Աննա Վարդապետյանը փրկո՞ւմ է ԱԱԾ տնօրենին, թե՞ «անմեղ մանիպուլյացիայի» է դիմել» վերտառությամբ հոդված ենք հրապարակել, ինչը չգիտես՝ ինչու, «հուզումներ» է առաջացրել Գլխավոր դատախազությունում, երբ այն հիմնված է չոր փաստերի վրա, և մենք ընդամենը փորձել ենք ցույց տալ, որ ՀՀ զինված ուժերում արձանագրված մահվան դեպքերի շարքում կամ համատեքստում ԱԱԾ ենթակայության տակ գտնվող սահմանապահ զորքերում արձանագրված դեպքերը հիշատակելը մոլորություն է առաջացնում և մանիպուլյատիվ է:

Իսկ այսօր՝ ապրիլի 30-ին, Կառավարության նիստից հետո կազմակերպված ճեպազրույցի ժամանակ Նիկոլ Փաշինյանն անդրադառնալով սահմանապահների ծառայությանը՝ հետևյալ ձևակերպումն է արել.

«Ես ՀՀ վարչապետն եմ, բայց կարող է չիմանամ, եթե հարց լինի, թե ՀՀ սահմանապահն ինչպես է իր ծառայությունն իրականացնում, ինչ տրամաբանությամբ, որովհետև դա իմ օրակարգի հարց չի»:

Հիշեցնենք, որ Սահմանապահ զորքերն ԱԱԾ ենթակայության տակ են, իսկ ԱԱԾ-ն ուղիղ ենթարկվում է Նիկոլ Փաշինյանին:

Մասնավորապես, ՀՀ ԱԱԾ կանոնադրությունը և կառուցվածքը հաստատելու մասին 2018 թվականի հունիսի 28-ի Նիկոլ Փաշինյանի որոշմանը կից հավելվածի՝ ԱԱԾ կառավարմանն ու ղեկավարմանը վերաբերող հատվածում նշվում է, որ «Ազգային անվտանգության ծառայությունը կառավարում է վարչապետը»: Իսկ ԱԱԾ տնօրենը «կառավարում է ազգային անվտանգության ծառայության ենթակայությանը հանձնված կազմակերպությունները և հիմնարկները»:

Այսինքն, թե ինչպես կծառայի սահմանապահը, ինչ տեղի կունենա սահմանապահ զորքերում, այստեղ պատասխանատվություն ունի և՛ Նիկոլ Փաշինյանը, և՛ ԱԱԾ տնօրեն Անդրանիկ Սիմոնյանը, իհարկե, նաև ԱԱԾ սահմանապահ զորքերի հրամանատարը: Հիմա, երբ Նիկոլ Փաշինյանը, ով օրեր առաջ դարձյալ հպարտությամբ հայտարարում էր, որ Տավուշի մարզի սահմանազատված հատվածում Հայաստանի և Ադրբեջանի սահմանապահ զորքերը ծառայություն են իրականացնում առանց սաղավարտների, առանց զրահաբաճկոնների, և ինքնաձիգների պահունակները ոչ թե ինքնաձիգների վրա, այլ պայուսակների մեջ դրած, աբսուրդային չէ՞ այսօրվա ասածը, թե՞ չգիտի՝ ինչպես և ինչ տրամաբանությամբ է սահմանապահը տանում իր ծառայությունը:

Կարո՞ղ ենք ասել, որ Նիկոլ Փաշինյանն ամբողջ պատասխանատվությունն այս դեպքում դնում է ԱԱԾ տնօրենի վրա: Եվ այն դեպքում, երբ հատկապես նա լրագրողների հետ հարցուպատասխանի ժամանակ հայտարարել է, որ հայ սահմանապահներն Իրանի և Թուրքիայի հետ սահմանային հատվածներում կտեղակայվեն փուլ առ փուլ՝ պետության կարողությունների հզորացմանը զուգընթաց։

«Հենց 1990-ականների սկզբին Ռուսաստանի հետ ստորագրված պայմանագրով նախատեսվում է, որ ՀՀ սահմանապահ զորքերի կարողությանը զուգահեռ՝ մենք պետք է մեր սահմանապահ զորքերի վերահսկողության ներքո վերցնենք սահմանը։ Մենք ռուս սահմանապահներին նաև վճարումներ ենք իրականացնում սահմանը պահելու համար։ Նախկինում էլ եղել է, երբ ռուսաստանցի գործընկերները բարձրացրել են այդ գումարներն ավելացնելու հարցը, քանի որ այդ գումարները չեն բավարարում այդ ծառայությունը մատուցելու համար։

Մենք էլ հաշվարկում ենք, որ այդ գումարներն ավելացնելու թեման, որ կա, դրանք կարող ենք ծախսել մեր սահմանապահ կարողությունները զարգացնելու վրա, և կամաց-կամաց` ինչքան հնարավորություն ունենանք, ռուս գործընկերները կտեղավորվեն այն գումարի մեջ, ինչը մեզ համար շատ ծանր չէ վճարել, իսկ սահմանի մնացած հատվածների հսկողությունը կվերցնենք մեզ վրա։ Սա՝ հենց պայմանագրով նախատեսված»,- մանրամասնել է Փաշինյանը:

Նշենք, որ արդեն հայ սահմանապահները փոխարինել են ռուս սահմանապահներին Թուրքիայի հետ սահմանին գտնվող «Ախուրիկ» անցակետում։ Նույն պրակտիկան գործում է նաև Իրանի հետ սահմանին գտնվող «Ագարակ» անցակետում։

Այս տարվա փետրվարից Հայաստան-Թուրքիա պետական սահմանի «Մարգարա» անցման կետում սահմանային ծառայությունը նույնպես իրականացվում է բացառապես ՀՀ սահմանապահ զորքերի ուժերով։