168TV-ի «Զառան հարց ունի» հաղորդաշարի հյուրը «Իրազեկ քաղաքացիների միավորում»  ՀԿ-ի ծրագրերի համակարգող Դանիել Իոաննիսյան է։

Զրույցում անդրադարձ է կատարվել Աննա Հակոբյանի՝ «Անկախ դիտորդ»-ի և անձամբ Դանիել Իոաննիսյանի դեմ հնարավոր հայցերին, նախընտրական շրջանում Փաշինյանի ու նրա թիմի մեկնարկած սոցիալական ծրագրերի ինտենսիվ աճին՝ որպես պաշտոնյա ու նախընտրական թեկնածու սերտաճած այցերին, խոստումներին, անհավասար նախընտրական պայքարի դրսևորումներին, դրանց կանխարգելման հնարավորություններին։

Հարցադրումների մեկ այլ խումբ վերաբերել է հիբրիդային գործակալների դեմ պայքարի իրական նպատակների պարզաբանմանը և «Իրազեկ քաղաքացիների միավորում» հ/կ կողմից Հայաստանի ընտրությունների ռուսաստանյան միջամտության գործիք հանդիսացող Facebook-յան և Youtube-յան օգտահաշիվների ցանկի օբյեկտիվությանը։

Առանձին անդրադարձ է եղել «խաղաղության» հեռանկարին՝ ադրբեջանական շարունակական նկրտումների, Արցախում հայկական հետքը վերացնելու, Սահմանադրությունը փոխելու ու Հայ Առաքելական եկեղեցին բոյկոտելու պահանջների ֆոնին, և այլն։

Դանիել Իոաննիսյանի մի քանի արձանագրումներ՝ ստորև․

• Մենք շարունակում ենք պնդել, որ «Իմ քայլը» հիմնադրամի անվանումն ասոցացվում է «Քաղաքացիական պայմանագիր» կուսակցության հետ, և, այո՛, խախտվել է Ընտրական օրենսգրքի 19-րդ հոդվածի 6 կետի 1 մասը, կատարվել վարչական իրավախախտումների օրենսգրքի 40 կետ 16 հոդվածով նախատեսված վարչական իրավախախտում։

• Դատարանից ակնկալում ենք, որ հայցը բավարարելու է․ Հայաստանի դատարանների անկախության մասին, իհարկե, շատ մեծ պատրանքներ չունենք և դատական համակարգի մի շարք դեպքերում խիստ ոչ անկախ գործելը տեսել ենք բոլորս, բայց, այդուհանդերձ, դա մեզ չի կանգնացնում՝ իրավական պրոցեսներ սկսել։

• Խնդիրն ընկալումների մեջ է․ մինչև հիմա կան մարդիկ, ովքեր ընտրությունների ժամանակ ինչ-որ ակնկալիքներ ունեն, խնդիրն ինստիտուտների թերի աշխատելու մեջ է, որ երբեմն մարդը որպեսզի պետական համակարգից ստանա այն, ինչ որ իրեն հասնում է, պետք է դրա մասին ասի վարչապետին, վարչապետը ասի՝ էդ ձեր ասած՝ Պապոյան, գնա, Թորոսյան, արի, էս մարդու հարցը ինչի՞ չի լուծվում։ Ինստիտուտների չկայացվածության խնդիրն է։

Բայց ընտրությունների կոնտեքստում, այո, կան երկրներ, որտեղ արգելված է սոցիալական ծրագրերի ծավալ ավելացնելը․ օրինակ, Մեծ Բրիտանիայում սոցիալական ծրագրերի ծավալն արգելված է ավելացնել ընտրություններին նախորդող որոշակի ժամանակաշրջանում։ Մենք դա առաջարկում էինք Հայաստանում ընտրական բարեփոխումների սահմաններում՝ 2018 թվին, 2021 թվականին․ իշխանությունները չընդունեցին։ Շարունակելու ենք հետագայում ընտրական բարեփոխումների սահմաններում պնդել, քանի որ, մեր կարծիքով, սա խնդրահարույց է։

• Եթե դուք ինձ հարցնեք՝ նախընտրական մրցապայքարն ինչքանո՞վ է հավասար բոլորի համար․․․ օ, չէ՛, հավասար չէ, ցավոք սրտի, և հավասար չէ բազմաթիվ կոմպոնենտներով։ Մենք տեսնում ենք իշխանության կողմից, որ իշխանությունը փորձում է իր վարչական ռեսուրսներով պայմանավորված՝ մրցակցային առավելություն ստանալ, որոշ քաղաքական ընդդիմադիր ուժեր փորձում են ֆինանսական ռեսուրսներով մրցակցային առավելություն ստանալ, ընդ որում, թե՛ սրանք, թե՛ նրանք այդ մրցակցային առավելություն ստանալը թե՛ օրենքից դուրս տիրույթում են անում, և թե՛ օրենքի սահմաններում։

• «Քաղաքացիական պայմանագրի» մասով դիմել ենք Կոռուպցիայի կանխարգելման հանձնաժողով, ապրիլի 19 և 25՝ Գյումրիի և Երևանի համերգները նկատի ունենալով։ Ինչ-որ վարույթ հարուցել են, ՔՊ-ից բացատրություններ են ուզել։

• Բացահայտ աջակցող հայտարարությունները ևս խնդիր են, բայց դա դիտարկել՝ որպես միջամտություն․․․ Պուտինը մի բան է հայտարարում, Ջեյ Դի Վենսը՝ ուրիշ բան, Ֆիդանն ուղիղ չհայտարարեց, բայց, այո՛, դա էլ է խնդիր․ էթիկետը ենթադրում է, որ չպիտի նման բաներ անել։

• Ճի՛շտ հասկացեք, ես շատ կարոտում եմ Արցախը, ես երանի եմ տալիս էն վիճակին, որը կար էն ժամանակ, բայց էդ վիճակը պարզ էր, որ այլևս անվերջ չէր կարող տևել։ Հիմա հետին թվով որ նայում ենք, պարզ է, որ անվերջ չէր կարող տևել։

Այո՛, մենք կարող էինք շատ ավելի լավ լուծումներ ունենալ, կարող էինք ունենալ լուծումներ, որոնց արդյունքում Արցախում հիմա հայեր կապրեին․ մենք էդ շանսը բաց ենք թողել։

• ՀԱԵ հետ կապված հայտարարությունները, զարգացումները, որ ռետրոսպեկտիվ նայում ես, տրամաբանական էին (ես չեմ ասում՝ լավ են, Եկեղեցու հարաբերությունների այդ պատմության մեջ իշխանությունը շատ կարմիր գծեր է անցել, որոնք չպետք է անցներ):

Մանրամասները՝ հարցազրույցում