ՀՀ վարչապետ Նիկոլ Փաշինյանը Քննչական կոմիտեի ծառայողի օրվան նվիրված հանդիսավոր նիստի ընթացքում անդրադարձել է նաև Փարաքար խոշորացված համայնքի ղեկավար Վալոդյա Գրիգորյանի սպանության դեպքին՝ ընդգծելով, որ համոզված է, որ քննության արդյունքներով ոչ մի հարցի պատասխան բաց չի մնա:

«Ահավոր դեպք տեղի ունեցավ և ես համոզված եմ, որ առավելագույնն է արվում դրա համար, բայց պետք է վերադառնանք և հասկանանք ինչը էն չենք արել, որտեղ է բացթողումը, ինչ պետք է այլ կերպ լիներ, որ այդ ամենը տեղի չունենար։

Ընդհանրապես, Հայաստանում հանցավորության մակարդակը շատ լուրջ խնդիր է, առավել ևս բռնությամբ կատարված հանցագործությունները։ Ամեն կրակոց ամեն քաղաքացի, ի վերջո, զգում է, որ դա կրակել են իր վրա: Շատ կարևոր է, որ իրավապահ համակարգը կարողանա այս հարցերը վերլուծել»:

Ավելի վաղ հայտնել էինք, որ սեպտեմբերի 23-ին՝ ժամը 23։52-ին, ՆԳՆ ոստիկանություն ահազանգ էր ստացվել, որ Արմավիրի մարզի Մերձավան բնակավայրի Երևանյան խճուղում կրակոցներ էին հնչել։

Սպանվել էին Փարաքարի համայնքապետ Վալոդյա Գրիգորյանը և քրեական ոստիկան Կարեն Աբրահամյանը: Վիրավորում էր ստացել Արծրուն Գալստյանը:

Մերձավանում տեղի ունեցած սպանության դեպքով Քննչական կոմիտեն մանրամասներ և լուսանկարներ էր հրապարակել: Նարեկ Օհանյանը կալանավորվել է սպանությանն օժանդակելու մեղադրանքով, Մերձավանում համայնքապետին և ոստիկանին սպանողը՝ ձերբակալվել: