«Հանուն հավասար իրավունքների» կրթական կենտրոնի նախագահ, ԱԺ նախկին պատգամավոր Գայանե Աբրահամյանը «Ֆեյսբուք»-ի իր էջում գրառում է կատարել՝ հրապարակելով FIP-ի հրապարակումներից մեկի տեսապատճեն:

«Հիբրիդային պատերազմը պոզով֊պոչով չի լինում շարքից.

Օրեր առաջ տարածվեց թուրքական լրատվամիջոցի գրած սուտ տեղեկությունը, թե Հայաստանում մզկիթներ են կառուցվելու։

Այս «ցնցող» լուրը (կարելի է կարծել Հայաստանում չկա մզկիթ) կայծակնային արագությամբ տարածվեց հայաստանյան որոշ լրատվամիջոցներում եւ ռուսական տելեգրամյան ալիքներում, մինչդեռ FIP — Փաստերի ստուգման հարթակ-ը շատ կարեւոր գործ արեց` բացահայտելով կեղծիքի հեղինակ թուրք լրագրողին, թուրքական տվյալ լրատվամիջոցը, որն արդեն հայտնի ռուսական ապատեղեկատվական գործիքներից մեկն է ու սա ապացուցել էին նախկինում նաեւ եվրոպացի գործընկերները։

Բայց այստեղ, իհարկե, առավել մտահոգիչը ԹՈՒՐՔ-ՌՈՒՍԱԿԱՆ համատեղ ապատեղեկատվական օպերացիայի փաստը չէ, սա լինելու է դեռ շատ, այլ այն, որ ռուսաթրքական տեղեկատվական պատերազմի զենք ու գործիք դառնում են հայաստանյան մեդիաներն ու որոշ ընդդիմադիրներ։

Չնայած, երեւի բոլորովին պատահական չէ, որ նույն այդ թուրք լրագրողը պարբերաբար անդրադառնում ու փառաբանում է որոշ ընդդիմադիրների, անգամ հոդված է գրել ու հույս հայտնել, թե արդյո՞ք Հայաստանում նորից կծնվի Սասունցի Դավիթ (նկարը ստորեւ)։

Այս նոր տեսակի պատերազմի դեմ պատրաստ չենք ու սա խիստ վտանգավոր է։

Մի’ դարձեք հիբրիդային պատերազմի զենք մեր ներսում»,- գրել է Աբրահամյանը՝ տեղադրելով հրապարակման հղումը: