ՀՀ վարչապետի աշխատակազմի ղեկավար Արայիկ Հարությունյանը «Ֆեյսբուք»-ի իր էջում անդրադարձել է Մարզահամերգային համալիրում տեղի ունեցած հանդիպման վերաբերյալ մամուլի հրապարակումներից մեկին:

«Այսօր պետական մարմինների շատ ներկայացուցիչներ էին հավաքվել համալիրում կարևոր հարցեր քննարկելու, իրենց առաջարկները քվեարկությունների միջոցով ներկայացնելու, երկրի ղեկավարներին լսելու համար: Բայց դրա մասին առանձին կխոսեմ:

Հիմա էլի մամուլի մասին: Ուրեմն այսօր համալիրում կար մոտ 7500 մարդ, ճնշող մեծամասնությունը պետական համակարգից: Վերջին րոպեներին գրեթե դատարկ աթոռ չկար: Հիմա այս մարդիկ գնում են տուն, բացում են իմ կողմից «սիրված» «Հրապարակը» ու կարդում, որ իրենք «թռել» են միջոցառումից: Ո՞նց է վերաբերվելու նրանց մեծամասնությունը այս լրատվամիջոցին այսուհետ:

Իհարկե, անլուրջ են համարելու ու այլևս չեն բացելու այն: Որ ասում եմ դուք լրագրությամբ չեք զբաղվում, նեղանում եք: Դուք էժանագույն պրոպագանդա եք: Ու վերջ»,- գրել է Հարությունյանը:

Հիշեցնենք՝ Կարեն Դեմիրճյանի անվան մարզահամերգային համալիրում տեղի է ունեցել ՀՀ պետական մարմինների ներկայացուցիչների առաջին համաժողովը։

Միջոցառմանը ներկա են եղել Հանրապետության նախագահ Վահագն Խաչատուրյանը, վարչապետ Նիկոլ Փաշինյանը, Ազգային ժողովի նախագահ Ալեն Սիմոնյանը, Սահմանադրական դատարանի նախագահ Արման Դիլանյանը, օրենսդիր, գործադիր, դատական, իրավապահ, տարածքային կառավարման և տեղական ինքնակառավարման, անկախ և ինքնավար մարմինների, հատուկ ծառայությունների ներկայացուցիչներ, զինծառայողներ, ոստիկաններ, փրկարարներ, կրթական, մշակութային, առողջապահական հաստատությունների աշխատակիցներ, ուսանողներ, աշակերտներ, ավելի քան 7 հազար մարդ: