«Ընդդիմությունն իր հերթական կեղծ օրակարգն է բերել և փորձում է օրակարգեր գեներացնել: Ընդդիմությունը, որը ոչնչացված է մասնավորապես օգոստոսի 8-ին կնքված շրջադարձային փաստաթղթերից հետո, անընդհատ թեմաներ է փնտրում իր քաղաքական գոյությունը մինչև այս գումարման վերջ պահպանելու համար: Մի քանի օր առաջ այս դահլիճում լսումներ էին, դրանք էլ հերթական ֆեյք օրակարգն էին ոչնչի մասին, մեր հանրությունը հենց լսումները նայելով հասկացավ, թե ինչ խայտառակություն էր այստեղ կատարվում»,- ԱԺ նիստում ասաց ՔՊ խմբակցության քարտուղար Արթուր Հովհաննիսյանը:

Անդրադառնալով «Հայաստան» դաշինքի ներկայացրած նախագծին՝ Հովհաննիսյանը նշեց. «Հիմա էլի կեղծ օրակարգ է բերվել, թե ցեղասպանությունը փորձում են մերժել, արտահայտություն հնչեց, որ տոտալ քարոզչություն է տեղի ունենում ցեղասպանության դեմ, սա խայտառակություն է, այս թեզն ամբողջությամբ կեղծ է: Մենք պետք է նայենք ու տեսնենք, թե պատմական տարբեր ժամանակաշրջաններում ինչեր են մեզ հետ տեղի ունեցել, որ այլևս երբեք տեղի չունենան, և մենք կարողանանք կանխել նման ողբերգությունները: Դուք վերցրել եք այս թեման և կրկին խաղում եք մարդկանց հույզերի հետ, ինչպես խաղում եք 44-օրյա պատերազմի զոհերի, վիրավորում ստացած մարդկանց և նրանց հարազատների վշտի հետ: Ինչպես վերջերս խաղում էիք Փարաքարում տեղի ունեցած դեպքերի հետ կապված այդ շրջանակի մարդկանց վշտի հետ, դուք ման եք գալիս վիշտ և ցավ, որ գաք ու դրա վրա փորձեք քաղաքական միավորներ հավաքել»։