Բուժծառայությունների մարզային հասանելիության և համաչափ զարգացման համատեքստում ևս մեկ կարևոր քայլ. «Հայկական ակնաբուժական նախագիծ» բարեգործական հիմնադրամի աջակցությամբ Եղվարդում բացվել է մարզային նշանակության կլինիկա:

Ակնաբուժական ծառայության բացմանը ներկա է գտնվել առողջապահության նախարար Անահիտ Ավանեսյանը. «Մեր ռազմավարությունն է ստեղծել ծառայությունների հասանելիություն մեր բնակչությանը. սա նշանակում է, որ պետք է ունենանք պատշաճ ենթակառուցվածք, նորագույն սարքավորումներ, վերապատրաստված կադրեր և ծառայությունների հասանելություն պետական պատվերի, հաջորդիվ` առողջության համապարփակ ապահովագրության շրջանակում»,-նշել է նախարարը:

Բուժծառայությունը կգործի Եղվարդի «Նաիրի» ԲԿ-ի շենքում: Անահիտ Ավանեսյանն իր խոսքում նշել է, որ, թեև բուժկենտրոնների լայնածավալ կառուցման, վերակառուցման փուլում ենք, սակայն չպետք է այդ ընթացքում բաց թողնենք կարճաժամկետ լուծումների հնարավորությունը մեր քաղաքացիների համար:

Այս կլինիկան հինգերորդն է, նախորդը գործարկվել է տարեսկզբին՝ Գորիսում։

Հայաստանի մի շարք քաղաքներում ՀԱՆ-ը նաև վերազինում է պոլիկլինիկաների ակնաբուժական ծառայությունները:

Նախարարն իր խոսքում շնորհակալություն է հայտնել հիմնադրամին կարիքներին արձագանքելու, հընթացս առողջապահական քաղաքականության ուղղվածության` կարևորագույն լումա ներդնելու գործում:

Կլինիկան ստեղծվել է Հարի Թ․ Մանգուրյան հիմնադրամի և Հայկական ակնաբուժության նախագծի ընկերների աջակցությամբ: