Ավելի վաղ հայտնել էինք, որ  նամակ ենք ստացել քաղաքացուց՝ Գարեգին Բ-ի եղբոր՝ Հայ առաքելական եկեղեցու Ռուսաստանի և Նոր Նախիջևանի թեմի առաջնորդ Եզրաս արքեպիսկոպոս Ներսիսյանի վերաբերյալ: Նամակը ներկայացնում ենք անանուն և առանց խմբագրման:

««Սրբազան գործակալ»․ Եզրաս Ներսիսյանի ճանապարհը

Արքեպիսկոպոս Եզրաս (Մկրտիչ Գրիգորի) Ներսիսյանը (ծնվ․ հոկտեմբերի 30, 1959, Ոսկեհատ, Էջմիածնի շրջան, Հայկական ԽՍՀ, ԽՍՀՄ) ներկայումս Ռուսաստանի և Նոր Նախիջևանի հայոց թեմի առաջնորդն է։ Սակայն նրա անցյալը ոչ այնքան «սրբազան» է, որքան ներկայացվում է։

1986-ի հուլիսին Ներսիսյանը հավաքագրվեց ՊԱԿ-ի կողմից՝ «Կարոն» գործակալական ծածկանունով։ Նրա գործակալական գործունեությունը դադարեցվեց 1988-ի նոյեմբերին, երբ գործերը փոխանցվեցին Լենինգրադի վարչություն։ Եվ ահա խորհրդային «հրաշքով» հենց այդ տարում նա նշանակվեց Լենինգրադի հոգևոր հովիվ։

Այս պատմությունը «հրաշք» է միայն նրանց համար, ովքեր հավատում են, որ գործակալական թղթապանակից կարելի է ուղիղ քայլել դեպի պատարագի սեղան։ Մինչ հավատացյալները խոնարհվում էին «հոգևոր հովվի» առջև, իրականում խոնարհվում էին նախկին գործակալի՝ ՊԱԿ-ի զեկույցների ստվերի առաջ։

Ուշագրավ է նաև այն հանգամանքը, որ Եզրաս Ներսիսյանը ներկայիս Ամենայն հայոց կաթողիկոսի՝ Գարեգին Բ-ի հարազատ եղբայրն է։ Այս փաստը ոչ միայն հարցեր է առաջացնում անցյալի մասին, այլև խոր կասկածներ՝ ներկայիս եկեղեցական համակարգի բարոյական հիմքերի շուրջ։

Այսօր արքեպիսկոպոս Ներսիսյանը շարունակում է ներկայանալ որպես հոգևոր առաջնորդ։ Բայց որքան էլ փորձի պատարագել սրբազան խորհրդով, նրա ամենահիշարժան «պատարագը» վաղուց մատուցվել է ոչ թե եկեղեցում, այլ ՊԱԿ-ի մութ միջանցքներում»: