«Ամեն ինչի համար է կրում պատասխանատվություն իշխանությունը»։

Այս մասին Փարաքարում համայնքապետ Վալոդյա Գրիգորյանի հոգեհանգստի ժամանակ լրագրողների հետ զրույցում նշել է Արմավիրի նորանշանակ մարզպետ Վահրամ Խաչատրյանը՝ անդրադառնալով հարցին, թե գործող իշխանությունը պատասխանատվություն կրո՞ւմ է կատարվածի համար։

Մանրամասնելով, թե գործնականում ինչպե՞ս է արտահայտվում այդ պատասխանատվությունը, Խաչատրյանը պատասխանել է.

«Դուք ապրել եք, տեսել եք տարիներ առաջ, տեսել եք՝ ոնց է եղել ու հիմա ոնց է։ Ակնհայտ երևում է, որ տարբերություն կա։ Հիմա տեղը չի, ժամանակը չի, դուք նորմա՞լ եք համարում այստեղ հարցադրումներ անելը։

Ժամանակից շուտ հրապարակումներ, մեկնաբանություններ պետք չի անել, կա քրեական գործ հարուցված, հանգամանքները կպարզվեն, բոլոր մեղավորները պատասխանատվության ենթարկվեն»:

Հարցին՝ ինչպիսի՞ հարաբերություններ է ունեցել սպանված Վալոդյա Գրիգորյանի հետ, մարզպետը նշել է. «Պարոն Գրիգորյանի հետ լավ հարաբերություն ունեմ, կարճ ժամանակահատվածում հասցրել էինք ընկերանալ, երեկ պիտի հանդիպեինք։ Էլ չեմ կարող խոսել»։

Ինչպես հայտնել ենք, սեպտեմբերի 23-ի գիշերը Մերձավանում սպանված Փարաքար խոշորացված համայնքի ղեկավար Վալոդյա Գրիգորյանի մարմինը բերվել է Փարաքարի մշակույթի պալատ, որտեղ ընթանում է վերջին հրաժեշտի արարողությունը:

Վերջին հրաժեշտի արարողությանը ներկա են եղել ներքին գործերի նախարար Արփինե Սարգսյանն ու ՆԳՆ ոստիկանության պետ Արամ Ղազարյանը, ինչպես նաև ՀՀ ՆԳՆ ոստիկանության պետի տեղակալ Վարդան Վարդանյանը, Ներքին գործերի նախարարության գլխավոր քարտուղար Արա Ֆիդանյանը:

ՀՀ վարչապետ Նիկոլ Փաշինյանի անունից ծաղկեպսակ է դրվել մշակույթի պալատի մոտ: Ծաղկեպսակ է ուղարկվել նաև ԱԺ նախագահ Ալեն Սիմոնյանի անունից:

Հուղարկավորությունը տեղի կունենա սեպտեմբերի 26-ին՝ ժամը 12։00-ին, նույն վայրից։

Ավելի վաղ հայտնել էինք, որ ժամը 23։52-ին ՆԳՆ ոստիկանություն ահազանգ է ստացվել, որ Արմավիրի մարզի Մերձավան բնակավայրի Երևանյան խճուղում կրակոցներ են հնչել։ Նախնական տվյալներով՝ կան 2 զոհ, 1 վիրավոր։

Մահացածներից մեկը համայնքի ղեկավար Վալոդյա Գրիգորյանն է։