Ինչպես հայտնի է, Հովհաննավանքի հոգևոր հովիվ քահանա Տեր Արամ Ասատրյանը Հանրային հեռուստատեսության եթերում հայտարարել էր, որ 2021 թվականին Հայ առաքելական սուրբ եկեղեցու ներսում եղել է պարտադրանք՝ քաղաքական ուժերից մեկի նախընտրական հանրահավաքներին մասնակցելու համար:

ԻՔՄ-ից էլ հայտնել են, որ քանի որ հանրահավաքներին մասնակցելը թե՛ հին, թե՛ նոր Քրեական օրենսգրքով արգելված արարք է, «Իրազեկ քաղաքացիների միավորումը» սեպտեմբերի 17-ին հանցագործության մասին հաղորդում է ներկայացրել ՀՀ գլխավոր դատախազություն՝ խնդրելով քննել հրապարակային արված այդ հայտարարությունը, ինչին հետևել էր Արագածոտնի թեմում իրականացված խուզարկությունները, ձերբակալություններն ու թեմի առաջնորդ Մկրտիչ եպիսկոպոս Պռոշյանի ու դպիրի կալանքը:

Հոկտեմբերի 16-ին Տեր Արամը, լրագրողների հետ զրույցում անդրադառնալով տեղի ունեցածին, ասել է, թե չի ցանկանում, որ իրադարձությունները քաղաքականացվեն, քանի որ ամեն ինչ արվում է Եկեղեցու բարելավման համար:

«Մենք պետք է Եկեղեցին սիրենք ավելի շատ, քան այն անհատին, որը խանգարում է Եկեղեցու բնականոն գործունեությանը»,- նշել է քահանան:

Իր նկատմամբ տարբեր գնահատականներին ու մեկնաբանություններին անդրադառնալով՝ նա ընդգծել է՝ կաթողիկոս դառնալու ցանկություն և իրավունք չունի:

«Ես չեմ կարող և չեմ ուզում դառնալ Ամենայն հայոց կաթողիկոս, քանի որ ինձ հոգեպես բավականաչափ մաքուր չեմ համարում: Ավելին՝ ես ամուսնացած եմ և չունեմ ընտանիքս թողնելու մտադրություն՝ կաթողիկոսի պաշտոնի համար: Ես կարծում եմ, որ կաթողիկոսը ընտանիք չունի, և կարծում եմ, որ Մայր Աթոռը կհերքի սա և պետք է հերքի»:

Քահանան վստահեցրել է՝ թշնամիներ չունի:

«Ես թշնամիներ չեմ փնտրել Եկեղեցում։ Եթե նրանք ինձ Հուդա են անվանում, ապա ո՞վ է Քրիստոսը այս ամենում։ Դուք ասում եք, որ Եկեղեցում կա մեկը, որ մեղքեր չի գործում։ Դուք ասում եք, որ կաթողիկոսը սխալներ չի՞ գործում։ Նրանք գիտեն, որ սխալներ են գործում։ Եթե մեղք կա, ուրեմն կա նաև անարդարություն։ Ո՞ւմ դեմ եմ մեղանչել՝ Եկեղեցո՞ւ, թե՞ անհատի դեմ», — նշել է նա։

Ըստ նրա՝ այս ամենը սկսվել էր դեռևս Նիկոլ Փաշինյանի կողմից Եկեղեցու մասին խոսելուց առաջ։

«Ինչո՞ւ են այս ընթացքում սրվել նվաստացումներն ու պատիժները։ Մենք պետք է ուշադրություն դարձնենք ոչ թե նրան, թե երբ և ինչպես է Նիկոլ Փաշինյանը բարձրացրել խնդիրը, այլ նրան, թե ինչ է նա ասել։

Մի՞թե չեմ կարող բարձրացնել իմ ձայնը և տեղեկացնել ժողովրդին որպես Եկեղեցու մաս, այն բանից հետո, երբ փորձեցի կապվել հոգևորականների հետ, որոնք հրաժարվեցին լուծել իմ բարձրացրած խնդիրները։

Ես իմ խնդիրը ներկայացրի կաթողիկոսին, և նա ասաց, որ իմ բոլոր խնդիրները լուծվել են։ Նրա խոսքերը պետք է հաշվի առնվեին, և ես ներողություն խնդրեցի, բայց Հայ առաքելական եկեղեցու Արագածոտնի թեմի առաջնորդ Մկրտիչ եպիսկոպոս Պռոշյանը անտեսեց կաթողիկոսի խոսքերը։

Ինձ պատիժ նշանակվեց, և դա ինձ վիրավորեց։ Ես գրավոր նախազգուշացումներ ստացա, այդ թվում՝ մեկ ամսով կարգալույծ անելու, ծեսեր կատարելու արգելքի սպառնալիքներ և այլն։ Ամբողջ աղմուկը ոչ թե խնդրի առկայության մասին է, այլ այն փաստի, որ ես բարձրացրել եմ այդ հարցը»,- ասել է քահանան: