2021 թվականի արտահերթ խորհրդարանական ընտրություններից առաջ սոցիոլոգիական հարցումները, որոնք կային, նույնքան տխուր էին և շարունակում են տխուր մնալ: Բարեբախտաբար, իրականությունը շատ ավելի ուրախ է: Այս մասին «Քաղաքացիական պայմանագիր» կուսակցության 7-րդ համաժողովի շրջանակում հրավիրված ճեպազրույցում հայտարարեց ՀՀ վարչապետ Նիկոլ Փաշինյանը՝ պատասխանելով հարցին, թե հարցումները ցույց են տալիս «Քաղաքացիական պայմանագիր» կուսակցության վարկանիշի նվազում:

«Ինչ վերաբերում է մեր թիմին, մեր թիմում կան վարչապետի բազմաթիվ թեկնածուներ, վարչապետի բազմաթիվ թեկնածուներից կան, իմ գնահատմամբ, 5-6 ֆավորիտներ»,- ասաց նա:

Նիկոլ Փաշինյանը, սակայն, անուններ չհնչեցրեց: Նրա խոսքով՝ ինքը համաժողովի շրջանակներում արդեն իր գնահատանքի խոսքը հնչեցրել է թիմի անդամների նկատմամբ:

Վարչապետն իր խոսքում ընդգծեց՝ ժողովրդից ստացած մանդատը ոչ մի պարագայում «անտեր չի թողնի»:

«Ժողովուրդն իր ընտրությունը կատարել է: Ես ժողովրդի արած ընտրությունը քամահրանքի չեմ ենթարկի, դա բացառված է: Հակառակ դեպքում, ըստ ձեզ, հե՞շտ էր և հե՞շտ է այս ամենի միջով անցնելը: Ոչ մեկը չի խնդրել, ստանձնել եմ պատասխանատվություն և պետք է մինչև վերջ տանեմ պատասխանատվությունը:

Ես շատ լավատես եմ 2026 թվականի խորհրդարանական ընտրությունների վերաբերյալ, որովհետև իմ ներշնչանքի աղբյուրը, ինչպես ասացի, ոչ թե սոցհարցումներն են, այլ ժողովուրդը, ում հետ ես և իմ քաղաքական թիմը ունենք օրգանական կապ: Պորտալարով ենք կապված մեր ժողովրդի հետ և զգում ենք նրա զայրույթն էլ, հիասթափությունն էլ, նրա պատգամներն ենք զգում և այդպես շարունակ»,- վստահեցրեց վարչապետը: