Գյումրու ավագանու «Քաղաքացիական պայմանագիր» խմբակցության ղեկավար Սարիկ Մինասյանը արձագանքել է քաղաքապետ Վարդան Ղուկասյանի՝ իրեն ուղղված հայտարարություններին և որակումներին:

Օրեր առաջ հրատապ ասուլիս հրավիրած Վարդան Ղուկասյանը լրատվամիջոցների ներկայությամբ հայտարարել էր, որ ՏԻմ ընտրություններին Սարիկ Մինասյանի բնակության թաղամասում ընտրակաշառք է բաժանվել: Նույն հայտարարությունն ավելի վաղ էլ էր արել Ղուկասյանը՝ իր դատական նիստերից մեկից առաջ՝ դատարանի բակում:

Մինասյանն անդրադառնալով Վարդան Ղուկասյանի այս հայտարարություններին Հանրային ՀԸ եթերում հարցազրույցի ժամանակ խնդրել էր դրանք ընդունել որպես հաղորդում հանցագործության մասին, ինչին ի պատասխան, Ղուկասյանը հայտարարել է՝ թե Սարիկ Մինասյանի շապիկն էլ է պատռվել, շատ է սիրում ոստիկաններին ու դատախազությանը։

«Հայկական ժամանակ»-ի հետ զրույցում Սարիկ Մինասյանն ասաց, Ղուկասյանն ինքն է մի քանի անգամ խոսել ընտրակաշառքի փաստի, տեղի, անգամ գումարի չափի մասին:

«Նա է մատնացույց արել իմ թաղի անունը՝ Գծի հետև, հայտարարել որ խանութից 60 հազար դրամ են բաժանել կողմնակիցներս: Նաև ասել է, որ ունի փաստ: Իր ասածը հաղորդում է հանցագործության մասին`մարդը ինձ մեղադրում է կաշառք բաժանելու մեջ»:

Սարիկ Մինասյանը միաժամանակ ընդգծեց՝ այն, ինչ ակնարկում է Վարդան Ղուկասյանը, վաղուց անցյալ է ու արատավոր խոսույթ:

«Պարոն Ղուկասյանին սխալ են բացատրել՝ իր այդ հայտարարության հիմքով դատախազությունը պատրաստվում է գործ հարուցել իմ կամ թիմակիցներիս վրա:

Իսկ եթե փոշմանել է ուղիղ եթերում իմ թաղի անունը շեշտելուց ու «բաժանված» գումարի չափն ու տեղը հայտարարելուց, թող ասի հանաք եմ արել, ոչ թե սուտ մատնություն»,- ասաց Մինասյանը: