Եվրախորհրդարանը հավանություն է տվել 61 երկրի քաղաքացիների հանդեպ առանց վիզային ռեժիմի երթեւեկության սահմանափակման մասին նոր կանոնակարգը։ Ցանկում ընդգրկված է նաեւ Վրաստանը։ Այս մասին հայտնում է Եվրախորհրդարանի Մամուլի ծառայությունը։ Նոր կանոնակարգով պարզեցվում են այն երկրները ներկայացնող քաղաքացիների առանց վիզային ռեժիմի երթեւեկության իրավունքի չեղարկումը, որոնք ստեղծում են անվտանգային ռիսկեր, կամ խախտում են մարդու իրավունքները։

Նոր մեխանիզմը թույլ է տալիս Եվրահանձնաժողովին վերստին վիզային ռեժիմ սահմանել որոշ երկրների հանդեպ, որոնք անվտանգային սպառնալիքներ են ստեղծում կամ խախտում են մարդու իրավունքները։ Գործընթացը ներառում է մի քանի փուլ։ Նախ սահմանափակումը լինում է ժամանակավոր, մինչեւ որ տվյալ երկրի առնչությամբ իրականացվի հետաքննություն եւ այդ երկրի իշխանությունների հետ ծավալվի համապատասխան երկխոսություն, ապա, եթե խնդիրը պահպանվում է, արդեն սահմանափակումը դառնում է մշտական։ Վրաստանի պարագայում սահմանափակումը միայն պաշտոնատար անձանց է վերաբերվում։