Ազգային ժողովի «Քաղաքացիական պայմանագիր» խմբակցության պատգամավոր Լիլիթ Մինասյանին զարմացնում է քաղաքագիտական որոշ շրջանակների այն խոսույթը, որ եթե որևէ կողմի հետ հարաբերություններ ես կառուցում, մյուս կողմի հետ պետք է պարտադիր թշնամանաս: Ըստ նրա՝ սա մտածողություն է, որ պարտադիր պետք է մեկի հետ ընկերություն անես ընդդեմ մյուսի: Մինասյանի համոզմամբ՝ սխալ է հարաբերություններին այսպես նայելը:

Այս մասին նա ասում է «Հայկական ժամանակ»-ի հետ հարցազրույցում՝ անդրադառնալով վարչապետ Նիկոլ Փաշինյանի աշխատանքային այցով ՌԴ մեկնելուն և դրա հետ կապված արևմտամետ հայացքներ ունեցող շրջանակների կողմից հնչող քննադատություններին:

Մոսկվայում մի քանի տասնյակ հայեր, այդ թվում՝ հոգևորականներ, բողոքի ակցիա են իրականացրել Հայաստանի դեսպանատան մոտ ընդդեմ վարչապետ Նիկոլ Փաշինյանի՝ պարզելով նաև Գևորգ (Միքայել) Աջապահյանի լուսանկարներով պաստառներ:

Մինասյանը նկատում է՝ Հայ առաքելական եկեղեցու ռուսական թեմի առաջնորդը Կտրիճ Ներսիսյանի եղբայրն է, և Կտրիճ Ներսիսյանը, հասկանալով, որ ՀՀ-ում չունի աջակիցների բանակ, ՌԴ-ում է փորձում ցույց տալ, թե ՀՀ վարչապետի այցի ժամանակ կարող է ակցիա կազմակերպել:

«ՀՀ դատաիրավական հարցերի մասին կարող են խոսել միայն ՀՀ-ում ապրողները, դրսից մարդ չբերեք մեզ վրա, այն էլ՝ Եզրասի շրջակայքում հայտնված մարդկանց: Ինչպես Կտրիճն է ուխտադրուժ, այնպես էլ Եզրասը: Թող պատերազմի ժամանակ իրենց ձայնը բարձրացնեին»,- ասում է նա:

Դիտարկմանը, որ նախկին իշխանության մի շարք ներկայացուցիչներ պնդում են, թե դատաիրավական համակարգը ենթարկվում է իշխանությանը, իշխող ուժի անդամը ընդգծում է. «Ամբողջ հայ ժողովուրդը, 7 տարի է՝ մեր կոկորդից բռնած, ասում է՝ ինչ գործ ունեն նախկին ղեկավարներն ու նրանց շրջապատը ազատության մեջ: Եվ իրոք, դո՞ւք ինչ գործ ունեք ազատության մեջ, եթե մենք բռնապետական համակարգ ենք ստեղծել»:

Մինասյանն ասում է՝ չի զարմանա, որ մի օր էլ Աջապահյանն արդարացնի «Հոկտեմբերի 27»-ը, ինչպես Դաշնակցությունն էր ասում՝ պոռթկում է եղել այն:

Պատգամավորը Փարաքար խոշորացված համայնքի ղեկավար Վալոդյա Գրիգորյանի և նրա ընկերոջ սպանությունը մեծ ողբերգություն է համարում՝ ցավակցելով սպանվածների հարազատներին: Վերջինս չի հասկանում, թե ինչպես կարելի է նման ողբերգությունը կապիտալիզացնել քաղաքականապես: Մինասյանը հույս է հայտնում, որ արագ կբացահայտվի այս հանցագործությունը՝ միաժամանակ կարծիք հայտնելով, որ իրավապահ համակարգը որոշակի կորցրել է իր զգոնությունը:

Անդրադառնալով Գյումրու քաղաքապետ Վարդան Ղուկասյանի այն հայտարարությանը, թե ինքը ՀՀ-ի ապագան տեսնում է ՌԴ-ի հետ միութենական պետության կազմում՝ զրուցակիցը ասում է. «Վարդանիկը ամբողջ ընդդիմության խոսող գլուխն է: Նրա հետ կոալիցիա կազմածները թող ասեն՝ հիմա դուք թրքահպատակ շան տղա՞ եք, որ չեք ուզում միանալ միութենական պետությանը, թե՞ ուզում եք միանալ։ Ընտրություն կատարեք»:

Գյումրու քաղաքապետը մասնավորապես ասել էր. «Ոնց որ ամբողջ Եվրոպան է միություն կազմում, Չինաստանն ու Ռուսաստանն են միություն կազմում։ Հայաստանը իրենից ի՞նչ է ներկայացնում, որ միություն չկազմի, բայց անկախ Հայաստանի պետականությունը պաշտպանելով։ Եթե դրա համար որևիցե մեկը ինձ վատ բան կասի, ուրեմն ես իրան կասեմ՝ թուրքահպատակ շան տղա»:

Անդրադառնալով վերջին շրջանում Լևոն Տեր-Պետրոսյանի ակտիվացմանը և ՀՀ վարչապետ Նիկոլ Փաշինյանին ուղղված քննադատություններին՝ զրուցակիցը նկատում է. «Մի քանի տարի է՝ առաջին նախագահը չի տարբերվում խորհրդարանական ընդդիմությունից: Մեր նախկին ղեկավարները ժողովրդին էշի տեղ են դնում այն հույսով, որ մարդիկ մտածեն՝ մի մարդ ելավ և ասաց՝ Արցախը Հայաստան է, և Ադրբեջանը պատերազմ սկսեց: Պետության ներսում Ադրբեջանի փաստաբանությունն են իրականացնում: Գիտեն, որ բանավեճի գան, վարչապետը պատեպատ է տալու իրենց թեզերը, ջախջախելու է, էլ ոչինչ չեն ունենալու ասելու իրենց հետևորդների փոքրիկ խմբակին»:

Դիտարկմանը, որ ընդդիմությունը սեպտեմբերի 26-ին վարչապետ Նիկոլ Փաշինյանին անվստահություն հայտնելու վերաբերյալ ԱԺ լսումներ է հրավիրել, Մասիսի քաղաքապետն էլ հայտարարել է, որ այդ օրը լինելու է ԱԺ շենքի դիմաց, որը «Պատիվ ունեմ»-ի թեկնածուն է, Մինասյանն ասում է. «Դավիթ Համբարձումյանը և մյուս մանկլավիկները շատ լուրջ են ընդունել վարչապետի այն միտքը, որ ՀՀ-ում կան 3 մլն վարչապետացուներ: «Պատիվ ունեմ»-ը դուրս է եկել ընդդեմ Ռոբերտ Քոչարյանի: Իրար մեջ ուտելու են իրար: Ընդդիմությունը բակի տղաների պես կռվում է, վերջում էլ պապային են կանչելու՝ ՌԴ-ին: Օգոստոսի 8-ի փաստաթուղթը կապիտուլյացիա է ընդդիմության համար, որը վերացնելու է քաղաքական դաշտից: 5 տարի է՝ քաղաքական դաշտը ցնցում են, ցնցում են, ցնցում, ժողովուրդը չի ցնցվում»:

Առավել մանրամասն՝ հարցազրույցում: