Սոցիալական հարթակներում մեծ արձագանք է գտել Ռոզետ Ուստակարայանի գրառումը, որը պատմում է իր որդու՝ Հրանտի հետ տեղի ունեցած ցավալի միջադեպի մասին։ Ուստակարայանի խոսքով՝ իր հաշմանդամություն ունեցող որդուն՝ Հրանտին, տղամարդը մոտեցել է և մի քանի անգամ ոտքերով հարվածել կրծքավանդակին՝ թոքերի հատվածում, այնուհետև հայհոյել ու վռնդել նրան տարածքից, որտեղ երեխան հաճախ է լինում։

«Հրանտը խաղում էր իր փոքրիկ ավտոներով, երբ այդ մարդը մոտեցել է, հարվածել է և հայհոյելով վռնդել։ Երեկոյան, երբ ուշացավ և չվերադարձավ տուն, փնտրեցինք նրան։ Երբ գտանք, նա լուռ էր ու միայն հարցրեց՝ “Մամ, ես ի՞նչ արեցի”», -գրել է մայրը։

Ռոզետ Ուստակարայանը հավելել է, որ դեպքը տեղի է ունեցել իրենց տան մոտակայքում, որտեղ գտնվում են մի շարք դեսպանություններ, որոնց աշխատակիցները նկատել են տղային միջադեպից հետո։

«Ոչ մի երեխա չպետք է նման բան ապրի։ Սա բողոք չէ, սա վկայություն է՝ թե որքան խոցելի ու անպաշտպան կարող են լինել հաշմանդամ երեխաները։ Երբ Հրանտը լուռ է ցավից, մենք չենք կարող լուռ մնալ», — եզրափակել է նա։

Աղբյուրը