Հորդառատ կարկուտը և ուժեղ քամին զգալի վնաս են հասցրել Գյումրիի ենթակառուցվածքներին

Հունիսի 14-ի երեկոյան Գյումրիում տեղացած հորդառատ կարկուտը և ուժեղ քամին զգալի վնաս են հասցրել քաղաքի ենթակառուցվածքներին։ Մասնավորապես, մի շարք թաղամասեր հայտնվել էին հոսանքազրկված վիճակում, հայտնում են Գյումրու համայնքապետարանից։

Արտակարգ իրավիճակին քաղաքային իշխանությունները արձագանքել են օպերատիվորեն։ Քաղաքապետարանի կոմունալ բաժնի աշխատակիցները՝ բրիգադավար Սերգեյ Աճեմյանի գլխավորությամբ, անցել են արտակարգ հերթափոխի։ Չսպասելով էլեկտրացանցի մասնագետների ժամանմանը՝ Աճեմյանը անձամբ է ստանձնել էլեկտրիկի գործառույթը և արագ արձագանքել բնակիչների խնդրին։ Վնասված էլեկտրալարերի վերանորոգման արդյունքում վերականգնվել է հոսանքը թաղամասում՝ բացառելով էլեկտրաէներգիայի երկարատև բացակայությունը։

Քաղաքապետարանը շարունակում է գնահատել կարկուտի և քամու հետևանքները՝ միաժամանակ ձեռնարկելով անհրաժեշտ քայլեր՝ հնարավոր վնասները նվազեցնելու և քաղաքի բնականոն աշխատանքը վերականգնելու ուղղությամբ։