Ցավոք, թալանը և ամենաթողությունը մատնանշող որևէ հանրային հրապարակում դեռ չի ներգործել սույն ընկերության բարոյական նկարագրի վրա` այն փոքր ինչ մարդկային ուրվագծերի բերելու աղոտ սպասելիքով: Անդրդվելի տոկուն են: Հերակլեսին հաջողվեց Ավգիան ախոռները մաքրել, սակայն մեզ երբեք չի հաջողվելու մաքրել «Գազպրոմ Արմենիա» ՓԲԸ-ի ախոռները, որտեղ կեղտը շերտը շերտի վրա է կուտակվել` վերածվելով տառթի անտանելիորեն հաստ շեղջի: Իսկ աշխատակիցները չաղ ու բախտավոր են` կոկոսն ընկած Պույպույ մկնիկի պես, սակայն հասարակության հաշվին:

Հիմա անցնենք խնդրի բուն և հարակից շարադրմանը: Բնակարանս, որ գյուղական առանձնատուն է, գազաֆիկացրել եմ ավելի քան 10 տարի առաջ: Անցյալ տարի գազօջախը տեղափոխել եմ կողքի սենյակ` պատի հակառակ կողմը, նոր խոհանոց, և ավելացրել ջրատաքացուցիչ: Ընդունված կարգ է, (չգիտեմ` օրենքո՞վ, թե՞ անօրեն), դու արա, կգան նախագծում կավելացնեն: Ես էլ արել եմ, բնականաբար, ամբողջն իմ ծախսով. խողովակ, փական, զոդող և այլն: Թե` 17 հազար պետք է վճարես նախագծի համար: Բայց ինչո՞ւ, ինչի՞ համար վճարեմ այդքան գումար, դուք ոչինչ չեք արել, նախագծում փոփոխություն կարտարելու համա՞ր միայն: Եվ չհաշտվելով այդ մտքի հետ` չէի վճարում:
Այս օգոստոսին զանգահարեցին սույն ընկերության Արտաշատի մասնաճյուղից և կանչեցին: Թե` դիմում գրի: Գրեցի: Տվեցին մի հեռախոսահամար` ասելով, թե կզանգես, հրշեջից կգան, կակտավորեն, ակտը ձեռիդ կգաս մեզ մոտ: Զանգահարում եմ: Հանդիպում ենք փողոցում, ակտը լրացնում է, մոտենում ենք տերմինալին, թե` 11 հազար գցիր տերմինալը: Գցում եմ: Վճարման կտրոնը ակտի հետ փոխանցում է ինձ:

Հրշեջ անվտանգության ակտը, որ մեկ տարի ժամկետ ունի, տրվում է նոր կամ զրոյից գազ քաշողին: Ես այդ ակտի համար վճարել եմ, երբ գազաֆիկացնում էի բնակարանս: Հիմա՞ ինչի համար, երբ ձեր ինժեները եկել և ստուգել է անվտանգային համակարգը` օդատարներ, ծխատարներ: Արդարանում են, թե` դա մեզ հետ կապ չունի: Ասում եմ` բայց ես ձեր պահանջով եմ վճարել, ինքնաբավ նածաձեռնություն չի եղել իմ կողմից: Այսինքն, պասերով խաղալն է, ՀՀ քաղաքացուն գնդակի պես իրար մեջ տշենք այնքան, մինչև կփսկի:

Եվ, բացի այդ, հաշվում, հաշվարկում են ու ներկայացնում հաշիվը` 32, թե 36 հազար դրամ. այս պահին ստույգ չեմ հիշում: Հարցնում եմ` բայց ինչո՞ւ այդքան շատ: Նախ ինձ մոտ այդքան գումար չկա` ցուց տալով գրպանիս գումարը: Կարծես խղճմտանքը շարժվեց, թե` դու էլի ես եկել (քիչ հետո այդ մասին էլ կասեմ), ավելացված արժեքի հարկը չենք ուզում, վճարիր 23 հազար դրամ: Շշմում եմ, ի՞նչ ավելացված արժեքի հարկ, ես ՓԲԸ կամ սուպերմարկետ չեմ. այդքանն էլ չունեմ: Թե` ուրբաթ է, գնա, երկուշաբթի կբերես: Ինձ չեն ասում, թե ես ինչո՞ւ պետք է այդքան վճարեմ: Միայն միջանցքում բաց դռնից լսում եմ, որ ինժեները փոխտնօրենին ասում է` 8 մետր խողովակ: Թե ուրիշ էլ ինչ են գրել, չգիտեմ:

Իսկ ընկերության կատարած աշխատանքը կամ թափած քրտինքն այն է եղել, որ ինժեները եկավ, ոտքերի լոնքով չափեց խողովակի երկարությունը, նշեց թղթի վրա, դիտարկեց անվտանգության համակարգը` երկու ծխատար և երկու օդատար, որ տեղում են և գնաց: Այդքանը և վերջ, ուրիշ ոչինչ: Երբ մեքենա էր նստում, հարցրեցի` մոտավորապես ի՞նչ կարգի գումար եմ վճարելու վաղը: Ասաց` համակարգիչն է հաշվելու, բայց տնօրինությունը փոխվել է, գները թանկացել են:

Զանգահարում եմ սույն ընկերության լրատվական ծառայութուն` հարցնելով, երբ տնօրինությունը փոխվել է, ամբո՞ղջ հանրապետությունում են գները թանկացել, թե՞ միայն Արտաշատում: Եվ ինչո՞ւ պետք է իմ ծախսով արած աշխատանքի համար վճարեմ «Գազպրոմ Արմենիա»-ին: Լրատվականի խոսնակը` ընդառաջելով որպես կոլեգա, բարեխղճորեն ճշտեց ինժեներից և հեռախոսով տեղեկացրեց, որ փորձարկման և նման աշխատանքների համար են այդքան գումար գրել, թե քո առած խողովակները քեզ վրա գումար չեն հաշվել և կարող են զիջման գնալ` ներկի գումարը հանելով: Նախ ի՞նչ են փորձարկել, ոչինչ: Երկրորդ` ի՞նչ են ներկել, որ ներկի գումար են գանձում, դարձյալ ոչինչ: Եվ երրորդ, եթե ներկ գրել են, ուրեմն, բնականաբար, խողովակ նույնպես գրել են, հակառակ դեպքում ի՞նչ պետք է ներկեին:

Խողովակները գնել եմ Նանսենից, Ղուկասն էլ եկել զոդել է, վճարել եմ ես: Այդ ամենը որևէ առնչություն, անգամ հեռավոր աղերս չի ունեցել սույն ՓԲԸ-ի հետ:

Հիմա վերը նշածս հետոի մասին: Գազօջախը տեղափոխելիս ազդանշանային սարքն անհրաժեշտ չհամարեցի տանել նոր խոհանոց, քանի որ չէր աշխատում, շինարարական աղբի հետ գցեցինք: Անցյալ աշնանը եկան գիշերով, թե ո՞ւր է սարքը, գտիր, եթե հենց հիմա չտեղադրենք Սառուցյալ օվկիանոսը կհալվի և համաշխարհային ջրհեղեղ կլինի: Առավոտյան գնում եմ գազի գրասենյակ, ասում եմ` հիմա այդքան գումար չունեմ, մեկ կամ երկու օր սպասեք` մինչև կճարեմ: Չէ, հիմա, շուտ: Հաջորդ օրը վճարում եմ 23 հազար դրամ (երկու հարյուր դրամ ավել կամ պակաս): Մոտ մեկուկես ամիս հետո գալիս տեղադրում են: Փաստորեն համաշխարհային ջրհեղեղը հետաձվեց: Մի երկու ամիս հետո էլ եկան, թե սարքի 10 տարին լրացել է, պիտի փոխենք՝ անվճար: Ասացի ընդամենը երկու ամսական է, հարկ չկա փոխելու:

Ես տարին երկու անգամ ներտնային սպասարկման (չեղած սպասարկման) համար գումար եմ մուծում. ինչի՞ համար, եթե ազդանշանային սարքը այդ գնով վաճառում եք ինձ վրա, թեկուզ իմ մեղքով անհետացած: Եվ նախագծում փոփոխություն կատարելու համար ինչո՞ւ պետք է վճարեմ այդքան գումար` 11+23 հազար դրամ: Առհասարակ ՀՀ քաղաքացին ինչո՞ւ պետք է վճարի այսպես կոչված` կետերի գումար, երբ այդ մարդիկ որևէ անվճար ծառայություն չեն մատուցում, երբ անգամ գազօջախի աչքը բացելու սաեղ չունեն կամ չեն ուզում ունենալ: Որևէ կերպ չի արդարացվում այդ համընդհանուր գանձվող գումարը:

Մի տեղ Գազպրոմ Արմենիան է, մի տեղ ՀԷՑ-ն է, մի տեղ Վեոլիա ջուրն է, մեկ այլ տեղ թաղապետարանն ու քաղաքապետարանը, նախարարն ու փոխնախարարը, անգամ ԺԵԿ-ի պահակը. այդպես բարոյախեղելով մի ամբողջ ժողովրդի երբեք չնահանջող թալանի ու ամենաթողության, ցինիզմի ու լկտիության մամլիչի տակ: Հետն էլ ասում են, թե ժողովուրդը տեր չի կանգնում երկրին, թե երկիրը կործանվում է, իսկ մարդիկ անտարբեր են: Այդքանից հետո ՀՀ քաղաքացին ինչպե՞ս կարող է այս երկիրը զգալ, գուրգուրել ու փայփայել, երբ այդ երկիրը շարունակ լլկում ու խեղում է քաղաքացուն, թքում հոգու մեջ:
Հոդվածի հասցեատերը նաև ՀՀ դատախազությունն է. ընդունել ի գիտություն:

Ֆելիքս Եղիազարյան