Ռեժիսոր, Տիկնիկային թատրոնի գեղարվեստական ղեկավար, Հանրային խորհրդի անդամ Ռուբեն Բաբայանը նախորդ շաբաթ ՀՀ վարչապետ Նիկոլ Փաշինյանի հետ Տավուշի մարզի Կիրանց բնակավայր այցելած Հանրային խորհրդի անդամների թվում է եղել:

Վերջինս «Հայկական ժամանակ»-ի հետ հարցազրույցում ասում է՝ ավելի լավ է մեկ անգամ սեփական աչքով տեսնել, քան տասը անգամ ականջով լսել:

«Մենք մեր աչքի առաջ տեսանք կառուցված և կառուցվող տներ, տեսանք հրաշալի կառուցված դպրոց և ճանապարհներ: Դպրոցում տեսանք հրաշալի դահլիճ, որտեղ կարելի է համերգներ և ներկայացումներ կազմակերպել, ցուցադրել ֆիլմեր: Մենք տեսանք, թե մարդիկ ինչպես են կամաց-կամաց ավելի վստահ ապրում այդտեղ: Տեսանք վերանորոգվող եկեղեցի, իսկ Կիրանցի բնությունը չքնաղ է: Ովքեր կասկածներ ունեն, դժվար չէ, կարելի է վեր կենալ և գնալ ու տեսնել: Մեր փոխարեն ոչ մեկը չի կառուցելու մեր երկիրը, և ոչ մի բան միանգամից չի կառուցվում»,- իր տպավորություններով է կիսվում մտավորականը:

Բաբայանը նաև ֆիքսել է, որ սահմանին ամրաշինական աշխատանքներ են կատարվում, որոնք վերջինս համարում է ժամանակակից չափանիշներին համապատասխան: Նա համոզված է, որ այդտեղ զինվորը ապահով կլինի:

«Ասում են՝ ՀՀ-ում ինչ արվում է, արվում է Ադրբեջանի թելադրանքով, հիմա էս դիրքե՞րն էլ են Ադրբեջանի պահանջով արվում»,- հարցադրում է անում նա, ապա հավելում. «Մեր բանակը զինվում է նաև նոր զինատեսակներով, զարգանում մեր աչքի առաջ: Շատ կարևոր է, որ այս նոր զենքերի հետ մենք նաև կրթվենք: Մենք երկար ժամանակ մեր պաշտպանությունը կապել ենք ոչ թե կրթվածության, այլ հայրենասիրության հետ: Խնդիրը ոչ թե զենքի քանակն է, այլ որակը և ինչքանով ես կարողանում տիրապետել դրան»:

Ռուբեն Բաբայանն ասում է՝ Հանրային խորհրդի կազմում կան տարբեր մարդիկ, որոնք ոչ բոլորն են հավանում Կառավարության վարած քաղաքականությունը, սակայն Կիրանցում բոլորը միաբերան հիացել են արված աշխատանքով. «Բնակավայրերը չեն պաշտպանվում միայն զենքով, նաև այն կյանքով, որ այնտեղ կայանում են, մարդիկ չեն մտածում փախչելու, այլ տեղ գնալու մասին, շատերն էլ ուզում են գնալ այնտեղ ապրել»:

Մշակույթի գործիչը շեշտում է՝ երկրի բանակը և պաշտպանությունը պետք է դուրս լինեն քաղաքական խաղերից:

«Զինվորը պետք է զգա, որ ուշադրության կենտրոնում է: Նա գիտակցում է, որ ինքն է այս երկրի պաշտպանը և դրա համար լավ պայմաններում է»,- նկատում է զրուցակիցը:

Առավել մանրամասն՝ հարցազրույցում: