Կարծես թե նոր «փեսա» ենք ստացել. «թարմ» մանիպուլյացիա, որի մասին պետք է խոսել. Մանավազյանը՝ Կարապետյանին
ԱԺ «Քաղաքացիական պայմանագիր» խմբակցության պատգամավոր Արուսյակ Մանավազյանը «Ֆեյսբուք»-ի իր էջում անդրադարձել է «Տաշիր» ընկերությունների խմբի փոխնախագահ Նարեկ Կարապետյանի նոր մանիպուլյացիային և գրել.
«Ճիշտն ասած, որոշել էի էլ չանդրադառնալ Սամվել Կարապետյանի եղբորորդի՝ Նարեկին, քանի որ անհաշվելի են դարձել նրա տարածած հեքիաթներն ու մանիպուլյացիաները։ Բայց քիչ առաջ նկատեցի «թարմ» մանիպուլյացիա, որի մասին պետք է խոսել։
Նարեկ Կարապետյանը հայտարարել է, որ 2018 թվականի համեմատ հիմա առանձնապես ծանր հանցագործությունների թիվն ավելացել է 10 անգամ, այնուհետև նշել է, որ դրա պատճառն այն է, որ ուժայիններին ուղղում են ընդդիմադիրների և գործարարների դեմ։
Հիմա փչացնենք Նարեկի տրամադրությունը և իր թվերի հիման վրա կառուցած հերթական մանիպուլյացիան․ 2018-ին Հայաստանում առանձնապես ծանր 224 հանցագործություն է տեղի ունեցել, 2024 թվականին՝ 2100։ Բայց շտապեմ ձեզ հանգստացնել․ սա պայմանավորված է նրանով, որ վիճակագրության մեջ սպանությունների ցուցանիշում վերջին տարիներին ներառվում են նաև հանկարծամահ լինելու դեպքերը։ Դա պայմանավորված է քրեական դատավարության նոր օրենսգրքում կատարված փոփոխություններով, ըստ որի՝ քրեական վարույթ է նախաձեռնվում անգամ հանկարծամահության դեպքում։ Ի տարբերություն նախկինի, երբ նախապատրաստվում էին միայն նյութեր և քրեական գործ էր հարուցվում այն դեպքում, եթե ձեռք էին բերվում փաստական տվյալներ։
Որպեսզի պատկերացնեք․ 2018 թվականին, երբ հանկարծամահ լինելու դեպքերը ներառված չէին, տեղի էր ունեցել 35 սպանություն։ 2024-ին այդ թիվը հասել է 1565-ի, որից ավելի քան 1500-ը հանկարծամահ լինելու դեպքեր են։ Այսինքն՝ մինչև այդ ևս եղել են բնականաբար հանկարծամահության դեպքեր, սակայն դրանք չեն արձանագրվել վիճակագրության մեջ։
Իսկ Նարեկը, քանի որ նախորդիվ ևս նման փորձեր ունեցել է՝ կիսատ-պռատ և մանիպուլացնող տեղեկատվություն ներկայացնելու, կարծում եմ՝ ժամանակն է, որ փոխի իր խորհրդատուներին։
Ի դեպ, նախկին նախագահներից մեկի փեսան էլ սիրում էր խոհանոցում նստել և մենախոսություն վարել։ Կարծես թե նոր «փեսա» ենք ստացել։
Դոստոևսկին «Կարամազով եղբայրներ» վեպում մի հետաքրքիր միտք ունի․ կարծում եմ՝ Նարեկին շատ հոգեհարազատ կլինի այն․ «Նա, ով ինքն իրեն ստում է և հավատում սեփական ստին, ի վիճակի չէ ճանաչել ճշմարտությունը ո՛չ իր մեջ, ո՛չ էլ իր շուրջը»։
Վերջում մի խորհուրդ․ հոկտեմբերի 25-ից կրկեսի բացման մասին եք հայտարարել։ Դու էլ ամբողջ օրը խոսում ես, թե ինչ «վատ» են ապրում մարդիկ Հայաստանում։ Բա որ տոմսերի գները 5-ից 35 հազար դրամ եք դրել կամ 6-ից 40 հազար՝ կախված ժամից, էդ քաղաքացիների մասին չե՞ք մտածել։
Հ․Գ․ Հուսամ՝ նախընտրական նոր փիառ քայլ չի հասունանա անվճար կրկեսի տոմսերի տեսքով, որովհետև այն, ինչ դուք այս ընթացքում անում եք, հենց իրական քաղաքական կամ, ինչպես ձեր շարժումն եք բնութագրել, «ապաքաղաքական» կրկես է»։
#Կարծես #թե #նոր #փեսա #ենք #ստացել #թարմ #մանիպուլյացիա #որի #մասին #պետք #խոսել #Մանավազյանը #Կարապետյանին
