ԱԺ նախկին պատգամավոր Արման Բաբաջանյանի գրառումը. «2021-ին իշխանությունը խոստացավ իրականացնել դատական բարեփոխում, պետության հակառակորդներին պատասխանատվության ենթարկել։ Որևէ քայլ այդ ուղղությամբ չի արվել։
     Դատական համակարգը մնում է խորը ճգնաժամի մեջ․ վեթինգի մասին անգամ խոսք չկա։
     Քոչարյանը ազատության մեջ է, համառորեն չի հասկանում ինչու են Մարտի 1-ին տասը քաղաքացու իր հրամանով սպանելու համար յոթ տարի դատարան քարշ տալիս:
     Սերժ Սարգսյանին առաջադրված մեղադրանքները ծիծաղ են առաջացնում։
     Բայց հարցը միայն այս երկու անուններով չի սահմանափակվում․ պետությունը տարիներ շարունակ բռնազավթված է հարյուրավոր դատավորների, ուժային կառույցների ներկայացուցիչների ու կոալիցիոն գործակիցների կողմից։ Նրանց մի մասը թաքնվում է Ռուսաստանում, մի մասը հայտնվել է ԱՄՆ-ում, մյուսները տարիներով Հայաստանում անպատիժ ազատ դատերի են գնում ու գալիս։ Գործող իշխանությունը ցույց է տվել իր անճարակությունն ու կամքի բացակայությունը՝ իրական դատաիրավական բարեփոխում իրականացնելու և սահմանադրական կարգի տապալման պատասխանատուներին պատասխանատվության ենթարկելու հարցում։
     Սա քաղաքական և իրավական առումով լիակատար ձախողում է»: