Հոկտեմբերի 2-ին «Կրթվելը նորաձև է» շարժման շրջանակում Արարատի մարզում բացվել է կանանց առաջին մարզային ակումբը: Այն այսուհետ ամեն երեքշաբթի, հինգշաբթի և շաբաթ օրերին մեկ հարկի տակ է հավաքելու ինքնակրթվել, զարգանալ կամ պարզապես առօրյա հոգսերից կտրվել ցանկացող մարզաբնակ կանանց:

Այս մասին հայտնել է «Իմ քայլը» հիմնադրամը:

«Հետևելով ՀՀ վարչապետ Նիկոլ Փաշինյանի այն տեսլականին, որ համայնքային նորակառույց դպրոցները պետք է ծառայեն ոչ միայն որպես երեխաների դասապատրաստման վայր, այլև դառնան համայնքային ակտիվ կյանքի շուրջօրյա կենտրոններ, Վարդաշենի նորակառույց միջնակարգ դպրոցում վարչապետի թույլտվությամբ բացվել է ակումբ, որտեղ անցկացվում են դասընթացներ: Դպրոցը հագեցած է անհրաժեշտ գույքով և պայմաններով ակումբի կարիքները բավարարելու համար:

Բացման արարողությանը ներկա էին «Կրթվելը նորաձև է» շարժման տեղական կոմիտեի անդամները, 62 մարզաբնակ կանայք, ովքեր անչափ ոգևորված էին այս մասշտաբային շարժման և կանանց ակումբներ հիմնելու գաղափարի առթիվ: Նրանց խոսքով`այն ամենը, ինչ կա մայրաքաղաքում, իրենք չունեն, և խոսքը միայն կրթությանը չի վերաբերում. մինչ այս չկար պարզապես մի միջավայր որտեղ կարող էին հավաքվել հաճելի, առողջ մթնոլորտում շփվել, զարգանալ, մարզվել:

«Կրթվելը նորաձև է» ծրագրի ղեկավար Ստեփան Սարգսյանը ներկաների հետ հակիրճ կերպով կիսվեց շարժման արդյունքների, գաղափարախոսության և պլանների մասին: Իր ողջույնի խոսքում նա նշեց.

«Սա բացառիկ շարժում է, որ սկսել է ՀՀ վարչապետի տիկին Աննա Հակոբյանը, և շնորհակալ ենք ձեզ, որ ձեր հետևողականության, արձագանքի, պատրաստակամության ու էներգիայի շնորհիվ այսօր Արարատի մարզում ենք ու առաջինը հենց ձեզ մոտ ենք բացում ակումբը: Ուզում ենք, որ դուք էլ դառնաք շարունակական կրթվելու գաղափարախոսության կրող ու հնարավորինս շուտ վայելեք դրա պտուղները»:

Արարատի մարզի կանանց ակումբի համակարգող, տեղական կոմիտեի անդամ Մարինե Բագրատյանը շնորհակալություն հայտնեց «Իմ քայլը» հիմնադրամին` ի դեմս գործադիր տնօրեն տիկին Աննա Հակոբյանի` նշելով.

«Կանենք ամեն ինչ, որպեսզի յուրաքանչյուր կին այս ակումբում ազատ զգա իրեն կիսվել իր փորձով, պատմությամբ ու ուժով: Կնպաստենք, որ կանայք բացահայտեն իրենց ողջ ներուժը: Միասին կկարդանք, կքննարկենք, կզբաղվենք յոգայով, կկատարելագործենք անգլերենի իմացությունը և կունենանք մի անկյուն, որտեղ կլիցքավորվենք ծանր օրվանից հետո»:

Ներկա 62 կանայք մեծ ոգևորությամբ էին կիսվում գաղափարներով. մի կին` ասորիական համայնքի ներկայացուցիչ նշեց` «Այնքան շնորհակալ եմ, որ այսպիսի ակումբ կա, մեծ սիրով կմասնակցեմ ու իմ մասնակցությամբ կնպաստեմ, որ այս շարժումը դառնա համահայկական, իսկ Արտաշատ համայնքը լինի օրինակելի»:

Ակումբի շրջանակում անց են կացվելու արդի թեմաներով դասընթացներ, որոնք կնպաստեն համայնքաբնակ կանանց մտքի, մարմնի և հոգու զարգացմանը: Դրանք են` անգլերեն, յոգա, թվային գրագիտություն, ընթերցանություն։ Վերջինս խթանելու համար մարզային գրադարանը նախատեսել է ունենալ բաց ընթերցանության անկյուն, որտեղ ներկայացված բոլոր գրքերը ակումբի կանայք ցանկացած պահի կարող են գալ, վերցնել, ընթերցել` առանց պարտադիր կերպով գրադարանի անդամագրություն ունենալու: Խմբակի դասընթացները կվարեն յոգայի մարզիչ Արմինե Հարությունյանը, Վարդաշենի միջնակարգ դպրոցի ուսուցիչներ Օլյա Պետրովան, Հերմինե Ավալյանը (անգլերեն), Արմինե Ղարիբյանը, Հասմիկ Թումանյանը (թվային գրագիտություն), Ալինա Հարությունյանը և Աննա Ստեփանյանը (ընթերցանություն):

Յուրաքանչյուր խմբում նախատեսված է 25–30 մասնակից, սակայն մեծ հետաքրքրության և պահանջարկի դեպքում հիմնադրամը սիրով կվերանայի ակումբի առաջարկները։

Մինչև տարվա վերջ կանանց ակումբներ կբացվեն առնվազն ևս 3 մարզերում`նպաստելով համայնքային կյանքի ակտիվացմանը ու կանանց դերի ամրապնդմանը հասարակության մեջ»,- ասված է հաղորդագրության մեջ: