Չինաստանը սեփական ազգային անվտանգության ապահովման համար, մտադիր է առաջիկայում խստացնել հազվագյուտ մետաղների եւ որոշակի համաձուլվածների արտահանման հսկողությունը։ Այս մասին հայտնում է Չինաստանի Կոմերցիայի նախարարությունը։ Համաձայն հայտարարության, արտասահմանյան ընկերություններն ու ֆիզիկական անձինք, ովքեր Չինաստանում նման արտադրանք են ձեռք բերում, պետք է ունենան համապատասխան արտոնագիր, որը տրամադրում է Կոմերցիայի նախարարությունը։ Այն դեպքում, երբ նման արտադրանք գնելու համար հայտ են ներկայացնում այնպիսի անձինք կամ կազմակերպություններ, որոնք կապված են արտասահմանյան բանակների հետ կամ արդեն իսկ ներառված են «արտահանման հսկողության ցանկում», սկզբունքորեն ենթակա են մերժման։

Կմերժվի նաեւ այնպիսի արտադրանքի ձեռքբերումը, որը կարող է ծառայել զանգվածային ոչնչացման զենքերի նախագծման եւ ստեղծման համար, ռազմական պոտենցիալը ամրապնդելուն, ինչպես նաեւ այնպիսի առաջադրանքների կատարմանը, որոնք դասակարգվում են որպես ահաբեկչական գործողություն։ Բարձր տեխնոլոգիական միկրոսխեմաների արտադրության մեջ օգտագործվող հազվագյուտ մետաղների գնման հայտերը կքննարկվեն անհատաբար։