Արմավիրի մարզի դատախազությունը 2025 թվականի օգոստոսի 22-ին հայց է ներկայացրել դատարան՝ անզգուշությամբ կյանքից զրկելու մեղադրական եզրակացությամբ։ Գործը նույն օրը մակագրվել է դատավոր Արթուր Ադամյանին։ Iravaban.net-ը տեղեկանում է Դատալեքս դատական տեղեկատվական համակարգից։

Մեղադրական եզրակացության համառոտ բովանդակություն

Մ․ Բ․-ն մեղադրվում է այն բանի համար, որ նա, անզգուշությամբ կյանքից զրկել է իր դստեր Լ․ Շ․-ից ծնված երեխային:

Այսպես. Մ․ Բ․-ի դուստրը՝ Լ․ Շ․-ն դեռևս 2024 թվականի հունիս ամսին՝ տեղեկացել է, որ արտաամուսնական կապի արդյունքում հղիացել է: 2024 թվականի դեկտեմբերի 28-ին՝ ժամը 16:00-ի սահմաններում, գտնվելով 34-35 շաբաթական հղիության վիճակում, տանը վաղաժամ սկսված ծննդաբերության արդյունքում Մ․ Բ․-ի օգնությամբ լույս աշխարհ է բերել արական սեռի երեխա։Ծննդաբերությունից մոտ մեկ ժամ անց, երբ երեխան արտասվել է և ձայներ է հանել, Լ․ Շ․-ն, սենյակում լինելով միայնակ և գտնվելով հոգեճնշող վիճակում, երեխային փաթաթել է ջինսե տաբատով և խեղդամահ անելու եղանակով դիտավորությամբ ապօրինաբար փորձել է կյանքից զրկել, ապա կարծելով, թե երեխան մահացել է. նրան հանձնել է Մ․ Բ․-ին և ասել, որ տանի գցի զուգարանը: Մ․ Բ․-ն հանցավոր անփութությամբ՝ կարծելով թե երեխան մահացած է, այն պայմաններում, երբ պարտավոր էր և կարող էր նախատեսել երեխայի ողջ լինելու հանգամանքը և իր արարքի վտանգավոր հետևանքի առաջացման հնարավորությունը, տարել և նետել է երեխային հողամասի տարածքում գտնվող զուգարանը՝ արդյունքում շնչառական անցքերի և ուղիների օտարածին գորշադեղնադարչնավուն կղանքանման չտարբերակվող զանգվածներով փակվելու (օբտուրացիայի) հետևանքովառաջացած մեխանիկական շնչահեղձությամբ անզգուշությամբ կյանքից զրկելով երեխային։ 2025 թվականի հունվարի 03-ին՝ երեխայի դին հայտնաբերվել է քրեական վարույթի շրջանակներում՝ կատարված դեպքի վայրի զննության արդյունքում:

Այսինքն, Մ․ Բ․-ին մեղսագրվում է հանրորեն վտանգավոր արարքի կատարում, որը նախատեսված է ՀՀ քրեական օրենսգրքի 165-րդ հոդվածի 1-ին մասով։

Կիրառված խափանման միջոցը

Մեղադրյալների նկատմամբ որպես խափանման միջոց կիրառվել է բացակայելու արգելքը։

Գործի ներկա կարգավիճակը

2025 թվականի օգոստոսի 27-ին Դատարանը որոշում է ընդունել գործը վարույթ ընդունելու և նախնական դատալսումներ նշանակելու մասին։ Գործով առաջին դատական նիստը կայացել է սեպտեմբերի 8-ին ևս մեկըհոկտեմբերի 18-ին։ Գործով հաջորդ դատական նիստըհ կանցկացվի 2026 թվականի մարտի 2-ին, 16։00-ին։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Իրավաբան.net