Այսօր՝ սեպտեմբերի 26-ին, Երեւանում մեկնարկեց «Հայկական ակնաբուժության նախագիծ» բարեգործական հիմնադրամի եւ Լոս Անջելեսի մանկական հիվանդանոցի 23-րդ միջազգային համաժողովը՝ նվիրված ակնաբուժությանը:

«Արդեն 33 տարի Հայկական ակնաբուժության նախագիծը աշխատում է Հայաստանում ակնաբուժական համակարգի բարելավման ուղղությամբ։ Ավելին քան 20 տարի մենք կազմակերպում ենք նման միջազգային համաժողովներ՝ նպատակ ունենալով ներկայացնել մեր գիտելիքը եւ ամրապնդել համագործակցությունը։ Մեր ծրագրերից են Աչքի շարժական հիվանդանոցը, Մանկական կուրության կանխարգելման գերազանցության կենտրոնը, հինգ մարզային ակնաբուժական կենտրոնները, հինգ ախտորոշիչ ակնաբուժական կլինիկաները, որոնցից վերջինը բացվեց հենց այս առաքելության ընթացքում։ Մենք նաեւ հիմնել ենք ակնաբուժական երեք պոլիկլինիկական կենտրոններ։ Բացի այդ, ընդլայնել ենք շաքարային դիաբետի ծրագիրն ու ստեղծել դիաբետի դպրոցներ։ Շնորհակալ եմ, որ այստեղ եք։ Ձեր մասնակցությունն իսկապես ներդրում է Հայաստանի ապագայի մեջ, եւ մենք չափազանց շնորհակալ ենք։ Թեպետ ափսոսում եմ, որ անձամբ ձեզ հետ չեմ, հույս ունեմ շատ շուտով հանդիպել բոլորիդ», — տեսաուղերձում ասաց Հայկական ակնաբուժության նախագծի հիմնադիր նախագահ Ռոջեր Օհանեսյանը:

Ողջունելով ներկաներին`Առողջապահության նախարարի տեղակալ Արմեն Գասպարյանն ասաց․ «Հայկական ակնաբուժության նախագիծն իր գործունեության ընթացքում կարևոր տեղ է զբաղեցնում մեր երկրի առողջապահական համակարգում։ Տեսողական խնդիրները շարունակում են նվազեցնել կյանքի որակը․ չնայած ակնաբուժության ոլորտի եւ նոր տեխնոլոգիաների զարգացմանը՝ խնդիրների ծավալը մեծացել է, ակնային հիվանդությունները երիտասարդացել են։ Անհրաժեշտ է գտնել արդյունավետ լուծումներ, այդ լուծումներից մեկն էլ այսօրվա հանդիպումն է, որը կայանում է ՀԱՆ-ի 65-րդ բժշկական առաքելության շրջանակում»։

«Հայկական ակնաբուժության նախագիծ» բարեգործական հիմնադրամի տնօրեն Նունե Եղիազարյանը ներկայացրեց առաջիկայում նախատեսվող ծրագրերը՝ Հայաստանի ողջ տարածքում գլաուկոմայի հայտնաբերման սքրինինգ եւ նեղանկյուն գլաուկոմայի բուժում, Չոր աչքի գերազանցության կենտրոնի ստեղծում, մանկական ակնաբուժության ոլորտում հետազոտական աշխատանք եւ այլն։

Երկօրյա համաժողովին կներկայացվեն ակնաբուժության արդի ուղղություններին՝ մանկական ակնաբուժությանը, գլաուկոմային, նեյրոակնաբուժությանը, ցանցաթաղանթի եւ եղջերաթաղանթի հիվանդություններին, ռեֆրակտիվ վիրաբուժությանը, օպտոմետրիային վերաբերող զեկույցներ, պոստեր պրեզենտացիաներ: Առանձին պանելային քննարկում է անցկացվելու հայ եւ ամերիկյան գործընկերների կողմից՝ քննարկելու արհեստական բանականության կիրառումը բժշկության մեջ եւ հարակից ոլորտներում: Միջազգային համաժողովին ներկայացված բոլոր նյութերը մասնագիտական շրջանակի համար հասանելի կլինեն անվճար՝ ՀԱՆ-ի եւ ԼԱՄՀ-ի ստեղծած Մանկաբուժական առցանց կրթական հարթակում (OPEN): Այն կծառայի որպես ինքնակրթության եզակի հնարավորություն աշխարհի տարբեր անկյուններից հարթակին միացած բժիշկների եւ առողջապահության ոլորտի այլ մասնագետների համար: