Նախօրեին Երևանի Բագրատունյաց փողոցի շենքերից մեկի բակում սպանություն է տեղի ունեցել՝ ավտոտնակների մոտ։ Բնակիչները NEWS.am–ին հայտնեցին, որ սպանվածը մոտ 40 տարեկան էր և տվյալ շենքի բնակիչ։ Նրանց խոսքով, պատճառը վերջին օրերին իրենց շենքի բակ եկող տղամարդիկ են, որոնք հարբած վիճակում են եղել և շենքի բնակիչները պարբերաբար նրանց զգուշացրել են, որ այդ վիճակում չգան իրենց բակ, քանի որ բակում նաև երեխաներ, կանայք կան։

Ըստ բնակիչների՝ նախօրեին նշված անձինք ավտոմատներով եկել են և կրակոցներ արձակել, ինչի հետևանքով շենքի բնակիչներից մոտ 40 տարեկան տղամարդը մահացել է։

Այս պահին շենքի բակում հերթապահություն են իրականացնում նաև ոստիկանության աշխատակիցները։

Բնակիչներից մեկը NEWS.am–ի հետ զրույցում պատմեց. «Ինչ–որ տկտկոց լսեցինք, հետո մարդկանց ձայներ։ Հետո ընկերուհիս դուրս եկավ, եկավ ասաց՝ մարդ են սպանել»։

Սպանված տղամարդու հարևաններից Ռուզաննա Գուլասարյանն էլ պատմեց. «Կրակոցներ ենք լսել, երեք հատ, շատ ուժեղ, մեկ էլ ինչ-որ մեկը վազելով, զենքով կրակելով, մոտենում էր պատուհանին։ Ես չեմ տեսել ով է, ինչ է, սկի չիմացանք էլ, որ մեր շենքի լավ երեխան սպանվել էր։ Արտակարգ տղա էր, անունը Արտյոմ։

Պատճառը եղել է այն, որ դրանք հարբած, անջատված արդեն 3-4 օր գալիս էին, նստում էին բիսետկայում, իրենց զգուշացրել են, որ մյուս անգամ հարբած չգաք, այստեղ կանայք են նստում։ Այդ մուռը պահելով, երկու օր հետո եկան այս երեխուն սպանեցին։

Չհասցրեցինք, որ գոնե վազենք, օգնենք։ Երեք-չորս կրակոցներ հնչեցին։ Եթե վիճեին, կռիվ անեինն, կասեինք՝ դե կռվի ժամանակ է եղել։ բայց ինքն ընդամենը ասել է՝ մի եկեք հարբած նստեք այստեղ»։

Նա նշեց, որ Արտյոմն ամուսնացած չէր, ապրում էր ծնողների ու քրոջ հետ։

Առավել մանրամասն՝ տեսանյութում