ՀՀ վարչապետ Նիկոլ Փաշինյանը Ստրասբուրգում լրագրողներին ներկայացրեց 2026 թվականի ընտրությունների մասին իր կանխատեսումները:

«2026 թվականի հետ կապված՝ ես մեծ համոզմունք ունեմ, որ 2026 թվականի խորհրդարանական ընտրություններում ժողովուրդը Հայաստանի կառավարման մեզ տված մանդատը երկարացնելու է: Ինչո՞ւ, որովհետև այս քաղաքականությունը՝ խաղաղության օրակարգը, որ մենք վարում ենք, այդ քաղաքականության հեղինակը ժողովուրդն է:

Ես հասկացա, որ կուսակցության համաժողովում իմ ունեցած ելույթի այդ հատվածը կա՛մ չի նկատվել, կա՛մ չնկատվելու է տրվել: Ես ելույթում ասացի՝ 2021 թվականի նախընտրական պրոցես մենք մտել ենք ստանդարտ երրորդ հանրապետությանը հատուկ ռազմահայրենասիրական նախընտրական ծրագրով, ՔՊ-Դաշնակցական նախընտական ծրագիրը գրել, մտել ենք նախընտրական քարոզարշավի մեջ: Բայց հընթացս ժողովուրդը այդ տրամաբանությունը փոխել է:

Մեզ մոտ չկա ինստիտուտ՝ ընտրություններից հետո նախընտրական ծրագիրը փոխել: Բայց նախընտրական քարոզարշավի ողջ ընթացքում տեղի է ունեցել մի բան. ամբողջ քաղաքական նարատիվի և ընկալման ռազմավարության փոփոխություն է տեղի ունեցել, ինչը արտահայտված է Կառավարության ծրագրում:

Կառավարության ծրագրում գրված է՝ 2021-2026 թվականի գործունեության համար ժողովորդի առաջ կառավարության ստանձնած մեծագույն պարտավորությունը խաղաղ զարգացման դարաշրջան բացելն է: Դա 2021 թվականի խորհրդարանում քվեարկված ծրագիրն է: Այս օրակարգի նկատմամբ մյուս թեմաները ստանում են երկրորդական բնույթ: Մենք մեր մեծագույն պարտավորությունը կատարել ենք: Մեր կառավարությունը ձևավորման առաջին օրից հետևել է իր մեծագույն պարտավորությանը և կատարել է իր մեծագույն պարտավորությունը: Այդ մեծագույն պարտավորությունը ձևակերպել է ժողովուրդը և ժողովուրդն իր ձևակերպած խաղաղության օրակարգի ճակատագիրը պետք է որոշի 2026 թվականին խորհրդարական հերթական ընտրություններում, և պատմականորեն չի կարող այլ բան տեղի ունենալ, քան խաղաղության օրակարգի հաղթանակի վերահաստատումը: Ես համարձակություն ունեմ ասելու, որ մենք օրգանական կապով ենք կապված մեր ժողովրդի հետ. մենք չենք էս ամեն ինչը որոշում, որոշել է ժողովուրդը, և 2026 թվականին էլ որոշելու է ժողովուրդը, և մենք այդ օրգանական կապով գիտենք, թե ինչ է որոշելու ժողովուրդը»,- նշեց վարչապետը: